一個offer一個喪禮

星期三收到 st sara mt的 offer，估唔到佢地咁快手，唔識開心。隔左一輪先識打電話俾各方好友。咁0岩davy又入來上水搵我地，我同tak又差唔多時間搵到工，今次一聚唔知幾時先再相見。我地帶davy去廣城食tea，去TAK屋企睇相，去粉嶺圍梧桐河散步，過左既簡單又充實的一日。

星期四同星期五係爺爺出殯0既日子。雖然上次去阿君個妹個追悼會已去過殯儀館一次，但今次自己有份戴孝，身份特殊，有D期待。

一早，老豆同佢個四媽去醫院領遺體，我就0係屋企等東莞親戚來。來的只有林叔叔受伯爺兩公婆，姑媽趺親腳冇來。一干人等四點半去到紅磡萬國殯儀館，見到殯儀館RECEPTION有電視顯示每間靈堂屬於邊個先人，有D似恆生指數。門外有D人SELL 花牌/酒樓SELL解穢酒。

上到去爺爺所屬靈堂502，已見姑姐同一少年，佢就係細過我0既阿叔，仲有佢阿媽，年紀睇來比我地想像中大。佢兩母子睇來幾傷心，冇同其他人交談，其他人仲HEA HEA HA HA，又互相取笑穿孝服後0既樣子，氣氛十分熱鬧‧喪禮似乎係一個俾親屬聚首一堂0既機會。

一開波有道士問爺爺出生時晨，THEN著孝服0既人都要跪低聽道士唱歌唸經，內容有關爺爺身平同子女名字。THEN我呢個惟一在場0既孫女先戴孝，要腰纏白帶頭戴藍花。THEN摺金元寶，好快已熟手。摺金元寶呢個步驟幾好，等我有D世藝，IF NOT時間好難過。

0係靈堂愈坐愈凍，想入靈堂旁的火爐旁燒野，點知阿爺就0係火爐旁，唔覺意就咁瞻仰左。佢望落似蠟像，唔係我想像中又白又紅，唔恐怖。不過媽咪就幾驚，去燒野要任生陪，又唔敢接近爺爺，去toliet又要人陪，被我地取笑佢細謄。

第一批來賓係任生一班工友，淨係認得黑仔傑，佢地一身放工look，同任生講兩句就走左。第二個來賓係一著西裝0既年青人，淨係識大姑姐; 第三批係肥姑姐0既同事，成班仔，其中兩個唔知係咪見到肥姑姐個cutie男友幫手搞個喪禮，勁笑，笑到肥姑姐講笑叫佢唔好喊去上香; 最後一大批係姑婆d仔女，仲有姑婆其中一個孫女同最遲來的表弟禧禧。 佢地都有去睇阿爺，不過就冇乜傷感，都係來吹下水，其中一個男人一來就搵林叔叔巴結，有部份都等到九點半果晚儀式完左先走。四e兩母子就冇親友來，更覺可憐。隔來個靈堂就勁多人，多到坐唔sai，上香要排隊，可能係d大公司0既老闆。

番到上水，用吉兒買左兩寸腸仔一寸魚蛋當晚飯，由於聽日一早七點半要到靈堂，盡快訓。

第二日五點全世界起身，天都未光，未試過0係香港咁早起，香港早晨都未做。五點九出發，任生同樓下看更講我地去旅行。d報紙檔仲疊緊報紙，買左份蘋果上到車都冇精神睇。6點九到紅磡，0係m記食早餐，異常開胃。尋日個喪禮搞手叫任生買點心，佢以為點心係西餅，遲遲都未買，去到紅磡先搵，搵到佢發脾氣‧我地先上靈堂，第一次來殯儀館0既細佬妹唔驚，敢去睇爺爺，又燒錢，細路話燒左幾十億俾爺爺後(佢話燒時聽到林叔叔嗚咽) 就公然釣魚(佢上身仲著住果日探爺爺件女人胸 t shirt)，bb就摺元寶，不過媽咪一樣摺得咁差。九點堂倌話上棺，四弟想入去睇，佢阿媽唔俾，仲有推撞。then棺材抬出，戴孝0既人要一齊"買水"，堂倌問有冇男孫，在場惟一一個男孫任劍榮先係釣魚後彈起身，拎住個寫住任府0既燈籠帶領所有戴孝者出走廊對住個窗同盤水跪低買水。見佢個不知所措個傻仔樣忍唔住笑出來。番入靈堂，戴孝者(孫不用)上前檢查先人0既衫同陪葬品，電子儀器唔得，then每個人都要輪流點頭確認。呢個時候姑姐們同新袍們(mum除外)都喊 sai，估唔到佢地同爺爺咁好感情。四e 就喊到企唔穩。then就瞻仰同蓋棺，then上山，d仔坐靈車。

上到山(0係柴灣)好多人，仲要等左一輪先有等仲火葬前的儀式。我以為好似電視咁有個掣俾人按跟住就燒，但個棺材只係俾人推左入一個室，唔知有冇燒。眾人心情已平服，我地去九龍富豪酒店食解穢酒，有兩圍人。間野靜英英，仲恐怖過個靈堂，d野食一般，我地同姑婆d仔同埋四e兩母子一圍，任生同姑婆d仔女有傾有講，個搞手話佢可愛。四e兩母子冇乜出聲，不過都有幫人添茶。then一點度番上水，剪埋髮所有野就完，好似發左個廿四小時0既夢咁。

食飯問老豆多d佢地家族0既野，阿爸阿媽對爺爺都冇乜好感。不過大家都覺得四e兩母子好淒涼，唔知佢地係好愛爺爺，定係好憎佢? 佢個四仔一下子發現自己有咁多阿哥家姐，仲有姪，會點?都是爺爺種下的禍。