旅行後的必答題

長途旅行之後，總有幾個好難答的問題令我好為難。大家可以教下我點答。

1. 去左旅行咁耐，你學左d咩番來/ 有咩得著呀?

如果發問的是長輩或是見工時被問到，我作都會作一堆體面答案出來。但，問心，老實講，坦白說，我，只不過係出去見識下，趁後生仲有氣有力去睇下個世界 0者! 我唔係「向世界出發」果 d 藝員嘉賓主持，去得果幾日旅行就可以咁多感慨，矯揉造作的嘔出一大堆人生體會、人生道理來。
太假了。硬是要說，我想旅行令我對搵錢發達之類的香港人共同目標看得沒那麼重。我搵夠錢供樓同去旅行就可以了。但這點就香港人的價值觀看來，似乎不是甚麼好東西。



2. 你旅行有咩趣事呀 / 最難忘係咩呀?

以下的真人真事:

同事 :「乜你去過澳洲 working holiday 咩? 有咩事係最難忘架?」

我: 「um...我行李超重，坐內陸機時俾人罰左千幾蚊港紙!!」

同事:「係? 仲有冇呀?」

我: 「um... 我 0係澳洲一個山坡上同一個加拿大男仔同瑞士女仔一齊大叫 " DIU 你"!!」

同事:「... 仲有冇 d 再難忘 D 0既事發生呀?」

我 : .... (無言以對)

其實長途旅行時好多時間都用左0係坐長途車、洗衫煮飯之類等瑣事之中，平淡乏味的日子佔了大多數，並不是大家想像中那麼精彩。當朋友問這個問題，期待著會聽到什麼驚天動地的故事時，我的答案往往令他們感到失望。而他們的反應也令我覺得很無奈。我自以為很有趣的經歷往往得不到什麼共鳴。所以面對那些平時不怎樣去旅行的朋友時，答這個問題時我總是輕描淡寫便算了，免自討沒趣。

3. 去左咁耐，有冇豔遇呀?

唔知點解大家總覺得去旅行就會有豔遇。邊有咁易架? 但答有，又好似好扮野; 答冇，又好冇型。都係 Tak 的答案最好 「稱唔上。稱唔上。」