Lingwhatever's blog: 新春Family Trip

近年的農曆新年，我們一家都會參加便宜的中國短線風景旅行團避年。只係新年係大陸旅遊旺季，景點都擠滿人，加上塞車嚴重，交通情況難以估計。前年我們參加福建土樓tour，便遇上高速公路壞車，要在公路休息站呆等8小時，深夜4點先番到屋企。為免重蹈覆轍，今年我們決定參加HEA團，近近地join個中山+佛山酒店團，食好住好hea一回就算。

Day 1旅行團安排的唯一一個景點 - 賣瓷噐的佛山石灣公仔街。只係新年流流，好多店都關左門。

食完午餐就回酒店安頓再食tea。旅行團沒有其他安排。好hea的一天。

佛山恆安瑞士大酒店，高五十幾層。我們入住時相當冷清，只有兩三個旅行團和極少數的散客。究竟佛山這個二三線城市能否afford到一間高五十幾層的5星級酒店呢 ?

我們幸運地被分配到角落的房間，偌大的廁所座擁無敵街景。太浮誇了。只是晚上想來個無敵街景浸浴時方發現窗在晚上會反光，而且有蒸氣。想一邊睇景一邊浸浴要趁未天黑先得。

不得不提，這酒店的WIFI竟然可以翻牆上 Facebook和蘋果日報

在酒店食完TEA，對佛山零興趣的妹妹決定回房睡覺。雖然我都好眼瞓，但晚上有酒店自助餐，唔郁吓驚食唔落，於是同兩老到附近的祖廟及嶺南新天地看看。只是祖廟勁多人，要人流管制，加上要俾入場費，於是決定唔入，去嶺南新天地。

嶺南新天地參照上海的新天地，把一些舊建築翻新成CAFE、餐廳、手信店等的新興景點，免費入場，人頭湧湧。有些舊建築的確不錯，但人實在太多，影唔到相。我決定聽日一早趁D鋪未開門就行過來影相 !!! (如果我起到身的話)

行完新天地，八卦上左酒店Gym room 同泳池睇睇，諗住食buffet dinner前做做運動會開胃一D。點知一上到去就有幾個職員來招乎。泳池係室外的，沒有恆溫，所以已關閉; Gym room 的器材都幾新，但竟然一個人都冇，只有一個健身教練。由於唔想同教練你眼望我眼咁尷尬，我地只好打消做運動0既念頭。

酒店的buffet restaurant 不算大，在50樓，但食物很不錯，選擇多，有魚生同即叫即烤的生蠔。不比香港的酒店buffet差。只係雪糕太硬，又要自己「筆」，「筆」到手都軟都只係「筆」得果幾啖。

食完buffet都係7點幾，太飽，又太早，於是又去嶺南新天地行一吓當散步，順便睇夜景。其實旅行團第二天都安排左去嶺南新天地，我地無必要自己去。但佛山市內我們唯一感興趣的，就只有這個嶺南新天地而已。

斷斤買的書。知識多廉價

第二朝酒店buffet要8:30先開始。但七點幾就俾老豆拍門叫醒，問係咪去新天地影相。如果唔係老豆拍門，我可能已經放棄左去影相呢個念頭。當然我老豆呢D老派人對新天地冇乜興趣。佢只係慣左晨早五、六點就要起身，捱唔到8:30先落床去食早餐而已。

早上的無敵佛山view廁所。原來呢個鐘數浸浴先係最正的。

未夠8點就來到新天地，點知原來新天地係會關門的，要9:30先開。Fuck! 枉我仲放棄左個五星級酒店房間的睡眠，一早走來呢度。唔想就咁就走，圍住新天地景區走一圈，搏吓有冇其他入口冇俾圍欄圍住。哈哈! 真係俾我地搵到一個。

潛入新天地影完相番酒店食buffet早餐，跟之前參加過的內地短線團食的自助早餐相比，佛山恆安的早餐是太精彩了。那些年參加短線山水團的所謂酒店自助早餐，只有蒸雞蛋、白粥 (冇味)、炒麵 (勁多油)、炒飯(都係勁多油)、蒸飽(個皮係濕0既)、生果 (當然未搣皮)。美其名自助餐，實際上冇野柬得落手，仲要驚之後肚餓冇野食，偷運幾隻炲雞蛋出去。佛山恆安的早餐有ham，有即叫即煎的奄列，有薯餅，有德國腸，有pancake，太豐富了!! 唔使驚唔夠飽。惟一不足是冇即磨咖啡。

Buffet餐廳雖然位處50樓，但能邊食邊睇景的靠窗位置太少。我地食到其他住客走晒先等到呢個靚位影張到此一遊相。

食完飽早餐，11點退房，跟旅行團去我其實已經自己呢兩日去左三次的新天地出發。今次係第四次。

去完新天地，又食飯。個buffet早餐都未消化，又想留肚食晚上的另一個酒店自助餐，我已經唔記得呢餐食左D咩。

食完飯已經冇行程，直接去中山的喜來登酒店check –in。呢個團真係hea到笑。

跟佛山恆安相比，中山的喜來登熱鬧多了。有好多旅行團，亦有好多散客‧lobby仲有間Starbucks。喜來登比佛山恆安出名，但房間沒有浮誇的無敵街景廁所，比佛山恆安少了一個亮點，沒有驚喜。

等導遊派完匙卡上房，我們的兩間房竟然有一間完全未打掃，一間仲打掃緊。沒想到5星級的喜來登竟然會犯這種錯。打電話到reception叫他們換房，無奈他們說房已full，不能換。我們只能呆等服務員把其中一間房先打掃好，放行李到房間後再出外。是為中山喜來登給我們的最大驚喜。

放好行李，又是自由活動時間。本來對中山零興趣的妹妹終於認識到自己太hea，有點慚愧，決定跟我們一起坐的士去孫中山紀念堂公園看看。

踏上往孫中山紀念堂公園的的士，怎料又來一個驚喜。一架載了人的電單車忽然高速橫向駛來，嚇得坐車頭的老豆大叫，幸司機及時剎掣。回過神來之後，司機當然不忘問候一下電單車司機的母親。我坐車尾，睇唔清楚前面發生咩野食，都唔識驚。只係老豆大叫時也跟著大叫。

虛驚一埸之後，操普通話的司機終於有閒情跟我們聊幾句。他問為什麼我們要到孫中山紀念堂公園去，認為那裡沒啥好看。要去就去中山公園，都是燈，人們都往那兒去。

殘舊的孫中山紀念堂公園，有一個關於孫中山生平的博物館，但展品都是那些中史書上熟口熟面的照片，我和妹妹都冇乜心機睇，意外是兩老竟然睇得很入神，睇到博物館關門職員關燈才肯走。

逛畢孫中山紀念堂公園，就坐的士往剛才機口中「都是燈，人們都往那兒去」的中山公園出發。在中山市，以孫中山 / 中山/ 逸仙等名字命名的街道、公眾設施實在太多，很易搞錯。坐的士都要跟司機再三確認究竟指哪一個。

今次的司機是中山本地人。這位本地司機十分PROUND OF 中山，知道我們是香港來，不客氣地說中山可能比香港更好。他說中山地方大，沒什麼工業，空氣好，而且外省人少，治安很不錯，罪案極少，就算有都好快拉到人。最重要係福利好，睇醫生同教育都有好多津貼，老人坐車睇醫生又唔使錢。而且本地人的質素也愈來愈好，街道已很少垃圾。反觀香港，地方小，人又多，生活壓力又大，福利也沒有內地的好。無言以對。

的士司機口中的「都是燈，人們都往那兒去」的中山公園，人的確比剛才的孫中山紀念堂公園更多。只是，我只能說內地人的品味跟我們不同。我對這個公園的最深印象是一個要跟地上的菊花拍照的少女，為了拍攝效果，竟然把地上整盆菊花抬起來拍照，為藝術去得好盡。我跟妹妹不禁在一旁暗笑。

半小時遊畢沒甚睇頭的什麼中山公園，打算坐車回酒店。見公園有巴士，路經我們的酒店，心想坐巴士回酒店當遊車河也不錯，於是提議一家人齊齊坐公車。沒想到等車時排第六至十的我們上車後竟然差D冇位坐。原因是前面有一對夫婦竟然用膠袋霸了八個座位，害得排在他們後面的我們一家四口只能擠在車尾的三個座位上。甚少在內地坐公車的兩老和妹妹極憤怒，也不管那對夫婦聽不聽得懂廣東話，七嘴八舌地痛駡他們不文明和自私，之後又埋怨我為什麼不坐的士要迫巴士。對於曾多次在內地坐公車的我來說，公車上的不文明行為我已見怪不怪，可以處之泰然。而且沒有這次難忘的公車體驗的話，大家回家後對中山恐怕零印象。