關於手信和明信片

在網上看到一篇「不要買手信給我」的文章，喜見原來有人跟我有同樣想法，忍不住也寫一寫自己對手信的看法。

可能我一向比較冷酷無情，旅嘅地方又不是什麼shopping 熱點，我的朋友很少開口要我買手信，或者叫我幫佢地買野。老實說，真心覺得要求朋友去旅行時幫自己買東西/買手信是頗為自私的行為。畢竟大家都只是打工仔，去一趟旅行也不容易。旅行的每一天每一分每一秒都十分珍貴。要人地幫自己買野，就算你覺得你反正會俾番錢人，朋友都冇蝕底，但有沒有想過朋友要為你的一個沒有必要的請求付出心機和時間? 在人生路不熟的地方去買一樣野，說不定動輒要花一兩個小時。人家好不容易才去一趟旅行，何必要人地花一兩個鐘頭去serve你一個唔係好必要0既要求?坦白說，大部份手信或我們要求別人在外國買的東西都不是什麼必須品，冇都唔使死。點解要人地山長水遠幫你去搵幫你去買呢? 又，如果人地搵唔到你0既心水貨品，例如唔同色/唔同樣/唔同價錢/唔同牌子果D，當下喺外地又唔可能即刻問到你意見，咁你係咪要人地番hotel/ hostel 上網問左你先，然後第二日走番去買過呢 ? 咁又如果人地搵唔你又照幫你買左先，番到香港你又話唔鍾意，咁點算呢? 將心比己，你都唔想自己難得去一次旅行都要為朋友 ABCDE買這個買哪個吧？

既然買手信很煩人，那叫朋友寄張postcard 也不過份吧? 個人覺得這同樣是旅行的一個負擔。買postcard 不難，但寄postcard可不容易。邊度先有郵票買呢? 點知要俾幾多錢呢? 郵局點去呢? 這又係要花時間去搵去問。很多地方都沒有香港那麼方便，梗有一間seven 0係左近俾你買郵票。就算買到郵票，郵局又未必就腳，開放時間又不是很長，要去搵地方寄也得花一點時間。又，雖然很多人喜歡寫明信片，但更多的人真的沒有那麼好的文采或那麼多的情感去應付那明信片。我也不止一次看到自己的旅伴為了寫明信片而苦惱。寫得少又俾人話頹，寫多啲又寫唔出。最慘係寫完寄埋都有可能寄失，枉費心機。

我自己倒真的不太介意朋友去旅行不買手信不寫明信片給我。夠唔夠朋友唔係靠呢啲野來衡量。比起得到你的手信（其實多數都唔係好等使）,我更希望你 enjoy 你的旅行。當然，如果大家去旅行見到一樣野覺得好適合我，唔買俾我你會心掛掛瞓唔著的話，咁你就買俾我吧。我也是會很 appreciate的。

我也不是全盤否定手信和明信片的價值。我也曾經為別人送我的手信和明信片感動過。但我覺得手信和明信片應該是發自內心而又帶點率性的，不應該是例行公事。你當例行公事咁買，我當例行公事咁收，咁又有咩野意思?