窮遊伊朗(五) - Mashhad Couch surfing + 慘被長途巴士公司搵笨

中藥味的傳統伊朗菜

別了熱情的Melika一行三人，回到了兩位主人Heydar & Elahe的車，好像有點不太習慣。伊朗的星期五是假期，這天是星期四，等同香港的星期六，他們有半天假期，可以帶我們去吃一頓傳統伊朗菜作午餐。晚上他們有舊同學來探訪，Elahe 還會煮另一個大餐。雖然頭先食左Melika個三文治已經有七成飽，但聽見有得食大餐，不禁精神抖擻起來。期待-ing。

Heydar & Elahe載我們來到了市中心一家裝修雅致的傳統餐廳。當時已經是下午兩點幾，餐廳的客人不多。由於看不明蛇仔一樣的波斯文menu，點菜的工作就又Heydar負責。先來每人一杯甜到漏0既茶，由於太甜，飲左兩啖我就低調地放棄左冇飲 ; 再來味道咸咸酸酸的乳酪，由於都食過藏區果D乳酪，總算應付到。跟住來主菜，有茄子茸、羊肉球拼薯茸、一碟灰色醬，用來點麵包用的，而果個麵包就係呢間餐廳的特色菜。

唔理咁多，食左先講。先試個茄子茸。Well，食落去唔講真係唔會知係茄子，苦苦地，有濃烈中藥味，一碗碗又黑又苦0既苦茶頓時出現在我腦海內 ; 再試試果碟用來點麵包0既灰色醬，大穫! 陣中藥味仲勁，簡直係「固體版苦茶」，好難食。成餐飯，只有羊肉球拼薯茸比較正常。反觀Heydar & Elahe就食得津津樂道。碟「固體版苦茶」食到淋湯咁食。為免尷尬，我只能低頭沉默掩飾我對傳統伊朗菜的「不適應」。

左起: 餐廳的特式麵包、羊肉球拼薯茸、茄子茸、「固體版苦茶」，仲有兩盒乳酪

終於，難題來了。Heydar & Elahe問我們覺得食物怎樣。正盤算該怎樣回答才夠得體又不會太假之際，Rachel竟然十分坦白地說 “I think it tastes like Chinese medicine.”，而我亦好白痴地情不自禁地加了句 “Yes! I think so too!”。 Elahe禮貌地問 “So do you like it?”，我們還未回答，Heydar就幫我地答左Elahe :”Of course they don’t. Who will like medicine?”這時我已經意識到我地講錯野，氣氛亦有點尷尬，但已經覆水難收。負責點菜的Heydar應該相當失望。好在佢同Elahe 0既心情似乎冇受影響。果碟「固體版苦茶」依然食得津津有味。

雖然餐飯唔0岩口味，但我同Rachel一早已經決定要請佢地。食完D野，個待應拎左張野俾我地，我以為係單，一手就搶左，點知原來係問卷。Heydar笑著說其實佢落單果陣已經俾左錢。請客行動失敗。

Heydar說其實碟茄子茸本身唔係咁0既味，應該係甜甜地咸咸地。佢地估計係煮燶左先會苦。我地半講笑咁叫佢0係張問卷度寫低碟茄子茸似中藥。唔知Heydar係咪真係咁樣寫左，佢交左張問卷之後轉個頭就有疑似餐廳經理走來了解情況。餐廳經理同我地講應該要主動提出更換，佢地樂意換過碟。

       

食完飯，兩位主人問我們想去邊。我以為佢地有planning，冇諗過佢地問番我轉頭。由於已經是週末下午，很多店舖已經關門，留在市中心沒有意思，於是我提議找個可以從高處望到Mashhad全景的地方，Heydar就車左我地上離市中心不遠的Kuhestan Park。

在車上，Elahe說由於伊朗的年青人在學校難以接觸異性，所以公園是不少少男假日流連結識異性的地方。

Kuhestan Park其實是一個山頭，山頂上有平台、遊樂設施供大日細路遊玩。不過個人覺得這公園好像仍然在興建中似的，沒多少樹木。週末下午來這裡的人也不少，有一家大細，也有三五知己的少男少女。伊朗其實真的沒多少娛樂場所。放假唔去公園都真係冇乜地方去。

從Kuhestan Park看Mashhad全景，建築頗多，景觀濛濛

在Kuhestan Park的歡樂時光。山頂上莫名其妙地有架巨型衣車

離開Kuhestan Park，主人要去屋企附近的超市買今晚大餐的材料。伊朗的超市不多。這個超市是我們旅程中到過的唯一一個超市。超市的物價也不是想像中便宜，跟香港差不多。我買了一盒made in Iran的茶包，20小包一盒要HKD$30。

剛才請食飯行動失敗，今次超市買食材我地再次出擊，俾錢時跟Heydar鬥快。由於聽唔明其實買左幾多錢，我就拿出幾張最大面值的50萬Rail紙幣給超市職員。只是Heydar又不知跟超市職員說了些什麼，當超市職員找錢給我時，Heydar笑笑口帶點古惑地說我只是付了我自己盒茶包的錢。食材的錢最終又是由Heydar來付。請客行動又失敗。伊朗人的如客並不亞於中國人。

返到屋企，Elahe就忙著準備今晚的大餐，我們跟Heydar就坐定定吹水。本來想入廚房幫手，但當然又俾Elahe推返出廳。吹吹吓水，Heydar俾我地play吓佢果部翻左牆0既電視。Heydar最鍾意都係睇果個London based的伊朗電視台。個電視台其中一個頻道係播中東MTV的，大膽程度實不亞於歐美MTV。Heydar說這些性感MTV多來自黎巴嫰及科威特。在保守的伊朗看著這時性感MTV，實在覺得很這個國家很矛盾。一方面政府又很Religious很保守，連巴士地鐵都要分男女; 但另一方面，年青人其實很容易就能翻牆接觸親歐美國家的電視節目、電影及網頁。政府跟年輕人的隔膜矛盾比中國更大。究竟伊朗現時這種政教合一的保守生活模式可以持續到幾耐?

伊朗人的晚餐時間很晚，所以Heydar & Elahe的兩位大學同學9點半先來。以為係舊同學，見面應該好Casual。點知Heydar & Elahe 0係兩個同學快來到之前又執屋又換衫又打掃又化妝，就連我地放0係廳個backpack、床舖都要搬番入房。最搞笑係佢兩個尋晚臨瞓都冇沖涼冇刷牙，今晚就隆重其事又沖涼又刷牙。兩位大學同學入屋之前，大家仲要企起身來迎接。見舊同學都要咁，咁見家長點算?

冇覺好瞓

Heydar & Elahe跟兩位舊同學雖然好friend，不過原來已經兩年冇見，所以有說不完的話題。我同Rachel兩個言語不通的外人一路由九點半等佢地傾到十一，終於都有飯食。Elahe煮左湯 (橙黃色，估計有南瓜蔬菜之類，很合中國人胃口)、意粉沙律及乳酪 (都係咸咸酸酸，也不錯)。

以為食完飯就會散band，點知佢地愈傾愈high，仲話要翻牆睇電視煲埋劇 (好彩最後睇唔成)。當時已經十二點幾一點。我同Rachel因為瞓廳，再咁搞法真係唔知幾時先有得瞓。Elahe叫我地入房瞓佢張床，但我地當然唔好意思。無計可施之下，我決定伏0係我0係廳果張床0既床邊扮瞓著，連Rachel都呃埋，搏佢地唔好意思，俾番張床我地瞓吓。結果扮唔夠5分鐘，我的奸計終於得呈，佢地四位久別重逢的朋友決定轉移陣地返入房繼續吹水，我同Rachel終於可以有覺好瞓。一熄燈，我好快就真係瞓著左，連佢地四個幾時散band都唔知道。

星期五公眾假期，本來兩位主人話上午可以帶我們 “Breakfast in the nature”，不過佢地尋晚玩夜左，今日瞓晏左，中午又趕住去上英文班，”Breakfast in the nature”要取消，變成0係屋企食蕃茄雞蛋奄列。雖然冇得“Breakfast in the nature”有點失望，但Elahe 煮的蕃茄雞蛋奄列充滿中國風味，好好食。回顧整個伊朗之旅，我最回味的，就是她的蕃茄雞蛋奄列。

難忘蕃茄雞蛋奄列

兩位主人出門上課以後，我和Rachel也沒有什麼地方想去，在他們的家留到四點就坐Elahe幫我地call的taxi去巴士站準備6點半坐夜車去Yazd，的士費12萬rails，但個巴士司機0係離個站頗遠0既地方丟低左我地，行左幾百米先到。

坐VIP BUS慘被搵笨

拎住尋日0係travel agent買巴士飛果張一個字都睇唔明0既receipt，問左幾個人終於找到巴士公司的櫃位。時間尚早，巴士公司的職員只係叫我地sit down。我地買的是6:30出發的VIP BUS，費用50萬Rails (約HKD$150)。而Non VIP bus 是7:30出發，費用32萬Rails。由於車程很長，LP說要坐14-16小時，我地想瞓得舒服D，唔想第二朝去到Yazd死狗咁樣，所以選擇了貴一點的VIP bus。等到六點，巴士公司一個識英文0既疑似高級職員同司機走來叫我地上車，仲拎走我地張receipt，話要換番張ticket俾我地。我地不疑有詐，跟左佢地去上班巴，俾左張receipt佢地。經過一排排外型新穎舒適的VIP bus，我地來到我地坐果架寫有 “Super class”字樣的巴士。一上車，已經覺得有D唔對路，點解架車咁舊咁窄，同出面果D VIP BUS差咁遠? Rachel嘗試將座椅調較後D，點知較極都較唔到，似乎個掣係壞左，好沮喪。司機可能見我們外國人，熱情地送上私伙熱茶給我們。只是，我們對這VIP BUS實在有點失望。

假 VIP BUS

等到6:30開車時間，巴士依然冇人上車，而架車竟然開了。我同Rachel都覺得好surprise。唔通我地兩個咁巴閉，可以包車去Yazd?

既然架車冇人坐，我地就唔跟坐位編號，自己選自己鍾意0既位。只是好景不常，架巴士去左離車站不遠0既地方攞貨之後，竟然開番去巴士站。等到7:30，亦即係去YAZD的NON VIP BUS發車時間，竟然有一大班乘客來上車，而且上車的人扶老攜幼，一D都唔似係VIP BUS的乘客。我開始懷疑呢架車根本就唔係VIP BUS，係普通等巴士。懷疑左冇耐，一個巴士職員將剛才收走的receipt換來的巴士飛俾番我。雖然張飛我大部份字都睇唔明，但我仲睇得明少少數字，我見到32,000呢組數字，正正係non VIP bus 0既價錢。好明顯，我地兩個唔識波斯文0既水魚俾巴士公司「坤」左，用50萬VIP bus 0既價錢坐左32萬的non VIP bus。點算好呢? 俾人搵笨搵到上心口，但言語又不通，連自己俾左50萬買飛0既receipt都巴士公司職員偷龍轉鳳換走左，想追究都冇證據啦!

本來我都認命，覺得冇證冇據，又溝通唔到，追究都唔知有冇用。點知架巴士上吓上吓愈來愈多人，似乎爆棚，身後仲傳來煩人的細路喊聲，令我更加難以接受要屈0係咁0既巴士入面16個小時。正當我就快崩潰之際，一個巴士職員要求我們拎張巴士飛出來，要我地坐番車飛上列出的seat no. 坐。我終於忍唔住發火，問佢”Is this a VIP bus?” 個職員說 “no VIP bus”，然後又講左一堆野，似乎都係要我俾張飛佢睇番個seat no.。我冇答佢，佢見到我個袋張巴士飛，自己拎左張飛出來，指住個seat no.，示意我坐番seat no 上面個位。我話 “I buy VIP ticket, but this is not a VIP bus!!”，點知佢指住我張飛話 “this is not a VIP ticket!” 佢講完呢句我仲「興」，幾乎用鬧佢0既語氣同佢講 “YOU CHANGED MY TICKET!!”。這時，據Rachel事後所描述，成車D人都望住我。 而剛才6點鐘果陣有份帶我地上車的那個巴士司機同個巴士職員細細聲唔知講咩野。頭先我張receipt被換走時個巴士司機都在場，佢應該知道發生咩野事。由於有其他乘客要坐我同Rachel依家坐緊個位，雖然一肚氣，我地都係要坐番自己個位先。邊生氣，邊盤算落車之後可以點樣投訴呢間呃遊客0既古惑巴士公司。最少都要追討番vip bus 同non VIP bus票價個差額啦!!

我跟巴士職員的鬧劇上演完畢後，一個之前坐0係我地不遠的學者look乘客也走上前來，跟巴士職員理論，我地聽到對話內容有 VIP三個字，估計也是跟我們同病相連的受害者。職員叫佢去巴士公司的COUNTER，不久， 個學者look乘客回來，叫司機打開行李箱俾佢拎走d行李，估計佢已經退票唔坐。我地其實都可以咁做。但言語不通，不知道還有沒有其他車今晚去Yazd，所以都係決定留守。而當架巴士就快開出時，剛才跟我理論的巴士職員再上車，俾左各20萬我同Rachel。係VIP bus 同 non VIP bus 0既差額呀!仲多左2萬!! 如果唔係頭先發火，呢20萬我地都攞唔番呀! 20萬夠我0係伊朗食兩餐飯!! 巴士職員俾完錢我地後繼續拎住疊錢去我地後面，估計車上還有其他買了VIP飛的受害者。

擾攘到成八點巴士先開。去到食飯0既餐廳都已經十點，餐廳只有Kebab 飯+洗碗布烤餅供應，我同Rachel 兩個人share一份。去完廁所上車，司機打手勢示意我唔好再戴頭燈。估計可能係因為頭燈搞到佢車頭玻璃反光。冇得戴頭燈睇書寫日記，又瞓唔著，只能聽歌解悶。但因為M到，剛去完廁所好快又再谷尿，好辛苦，車外又係一片荒蕪，唔似有廁所，忍得好辛苦。忍左個幾兩個鐘，司機終於0係一個油站停車上貨，我就即刻落車去廁所。奇怪點解車上的伊朗人咁忍得，冇人需要去廁所。

去完廁所上車冇耐，因為M到，坐位又窄，又再有谷住谷住0既感覺，令我又再坐立不安，無論用乜野姿勢坐都覺得頂住晒，好辛苦。後來要解左牛仔褲粒紐同拉鬆底褲條橡筋「解除束縛」我先有覺好瞓。坐長途車真係唔應該著牛仔褲。尤其係M到0既日子。

快天光，巴士再停下來讓乘客上廁所及到清真寺祈禱。這是獨有的Iran experience。我也落了車去參觀一下。