兵分兩路-
這天終於可以多睡一點，不過都只係一點點，七點幾都係要起身。「鳩嗚組」 (媽+細佬妹)買左9點三去御殿場outlet的車票，八點三左右就出門口去東京站。畢竟東京JR跟新宿站都是巨型車站，搵路要時間，所以早D出門。不過結果佢地三個因為坐地鐵唔識轉線的關係都差D遲到，好彩架車肯等埋佢地。而「紅葉組」成員我+我老豆就八點先出門口，在附近的すき家 (唔識讀個名，我地叫佢做「乜乜家」)食個飽飯做早餐再出發。只係想不到，偌大的すき家只有我們兩父女及離桌的四個青年顧客，全部都係香港人。東京D香港遊客係咪真係多成咁呀 ?
乜乜家早餐
我們那張價值8300 yen大元的關東三天JR Pass已經過期，由今日開始，我們將使用三天subway pass連「機場快線」 Skylinner單程套票，價錢係3500 yen，可以三日任坐地鐵及包去成田機場的單程車票。前三日由於冇地鐵pass，我地儘量唔錯地鐵，只坐JR，連去新宿JR站都只係行路去。不過今日開始，我地可以喺「屋企」行幾分鐘坐地鐵了，省點腳骨力。不過鳩嗚組整天去左鳩嗚，佢地張三天地鐵pass可能都未能回本。
光之丘公園
我們第一站來到<光之丘公園>。步出地鐵不久就睇見藍天+黃得好鮮艷既銀杏並木。只係今日風好大，唔少黃葉都已經吹左落地。如果早幾日來應該更加靚。
相對其他公園，光之丘公園的遊人的確比較少，起碼我地冇再聽到廣東話。不過這裡的紅葉開得正盛，倒吸引了不少本地龍友來拍照。
細心欣賞紅葉才拍照的日本龍友伯伯
老豆食唔慣又冷又熱的日式早餐，一去到公園就搞肚要去廁所。我在公園這棵最大的銀杏樹下拍拍照。
生平最討厭日本仔的老豆都說，秋天的日本真係靚到似童話。
這天公園有一班似是幼稚園師生來旅行。學生們幫忙整理地上的枯枝落葉，好讓老師生火煮食。
紅葉下的秋千，太浪漫了。
十一點多離開光之丘，我們坐地鐵來到明治神宮前。一出地鐵站不久就見到古色古香的原宿車站。老豆D早餐都屙得七七八八，我們就決定在附先吃午餐。找到一家樓上居酒屋，一個飯都係幾百YEN就決定去食。不過原來東京食肆未完全禁煙，有不少打工一族在居酒屋內食煙。
古色古香的原宿車站
原宿居酒屋的午餐
明治神宮
食完飯就行去明治神宮參觀。明治神宮似乎是最受遊客歡迎的景點。連日來到過咁多景點，以這裡的外國遊客最多。不過這裡比較陰暗，秋葉不多，對於我等一心去日本睇秋葉0既人來說，可觀性一般。
準備於明治神宮行禮的新人
代代木公園
雖然明治神宮對我而言可觀性不高，但由於面積實在很大，倒也花了不少時間。來到神宮旁的代代木公園才兩點幾，但因為四點就天黑，所以兩點幾天色已經開始昏暗，不夠時間再去多個公園了。早知就應該去左代代木公園先去明治神宮。
天快黑之際方離開代代木公園。由於鳩嗚組六點幾先番新宿，我同老豆惟有在原宿表參道一帶逛街，感受一下東京的聖誕氣氛。
聖誕燈熄
表參道的樹上都掛滿燈飾，不少本地人及遊客都冒險走出馬路邊拍照。其實馬路邊有工作人員勸喻路人不要走出馬路，不過呢D工作人員看來都是學生，唔夠惡，又只會說日文，對外籍遊客而言沒什麼阻嚇力。本來有條天橋可以影到成條街，不過可能驚人多，條天橋封左。
表參道
影夠之後決定轉移陣地到六本木繼續影燈飾。六本木有幾個商場都有大型聖誕裝飾。但時間關係，我們只能去一個，便選了離地鐵站最近的Roppongi Hills，忍痛放棄mid-town。
Roppongi Hills望外東京塔
看過東京立商場的聖誕裝飾先知原來海港城的聖誕裝飾原來係咁小兒科。
掛住睇聖誕裝飾太忘我，忽略左已經行到腳痛既老豆。後來番到東京屋企先發現我地兩個都行到出水泡。太癲了。
七點幾會合「鳩嗚組」又回到尋晚食飯的新宿JR附近的地下食街食飯。只係「鳩嗚組」三人平時只係跟住行又唔認路，在迷宮一樣的新宿車站搵左好耐先搵到地下食街，等到又餓又腳痛的老豆發脾氣，仲話要自己出去搵佢地。我當然要阻止佢啦，因為我可不想一個人搵佢地四個對新宿站仲係一嚿雲既團友。
終於人齊開飯!!
沒有留言:
張貼留言