Lingwhatever's blog: 帶阿爸阿媽去歐洲 (一)

2018年6月5日星期二

帶阿爸阿媽去歐洲 (一) - 出發篇

從backpacker變成團友

自詡係 backpacker 嘅我今年的大旅行做左一件好唔backpacker 嘅事 - 帶父母拖喼去歐洲，仲要跟團 😅……

身為「職安真漢子」的老豆同「街市婆」的老媽近年都相繼「登六」。眼見不少長輩甚至同輩親友身體都開始走下波，不良於行，為左頭家勞碌半生的兩老都想趁自己仲「行得走得」，出去見識吓睇吓個世界。喺我呢個熱愛旅遊人士的推波助瀾之下，兩老終於起心肝，衝出亞州，一生人起碼豪一次，向嚮往已久的歐洲出發。只是兩老不諳任何外語，平時出國旅行都要依靠我同細妹打點一切，就連喺機場過關都係懵懵懂懂，就算跟旅行團去都感到淆底。兩老就打我主意，要我做一次孝順女，陪埋佢地一齊去。我雖然之前都帶過兩老到日本台灣自由行，但日本台灣比較易玩，要帶住兩老喺陌生的歐洲街頭張羅衣、食、住、行、屙，難度太高。最教人頭痛的是兩人都有一個「中國胃」，鬼佬野唔食得，生冷野又話肚屙，三文治芝士火腿果D又話有陣「酸縮味」，食唔落。權衡利弊之後我決定向現實低頭，由backpacker 變成團友，陪兩老去跟團。起碼就算食唔慣D野食，佢都都只會怪導遊，唔會怪我😏。

懷緬那些年的巴士團歲月

考慮到兩老唔知仲會唔會有機會再去歐洲，我要挑一個儘可能把歐洲最精華的景點一網打盡的旅行團，務求「去旅行，去到盡」。我想起大學生涯的最後一個暑假，我跟戰友 Tak 當時深感畢業後恐怕很難長時間旅行，決定在最後一個暑假豪一次，去歐洲旅行。當時我們仍然是「鵪春大學生」，我們的字典內並沒有「自由行」一詞，出國旅行，根本冇諗過可以唔使跟團，但又嫌一般的永安康泰團太走馬看花，團友又多為師奶阿叔，唔係好啱玩。Tak不知從哪裡打聽到有間叫學聯嘅旅行社有搞歐洲巴士團，標榜半自助遊旅行方式，旅程時間較長，晚上巴士會停泊在 camp site留宿，團友輪流幫忙煮飯煮早餐，睡覺時就把巴士的座位變身成床鋪，大家睡在巴士上，節省旅費。為了省錢，我和 Tak 在那年就報名參加了學聯的17天西歐巴士團。當時是沒有Smart Phone、沒有 WiFi 的年代，數碼相機都係剛剛流行，SD 卡只有128MB容量，不能拍太多照片。但正因為科技落後，團友又大多是年青人，年紀相若，大家晚上食飽飯冇野做都鍾意圍坐在巴士外吹水玩遊戲，又或三五成群在camp site 散步談心甚至「照田雞」，好不愉快。雖然巴士團的行程在我眼裡依照是太過走馬看花，但回想起跟團友們一起在camp site 「hea」的晚上還是十分難忘，好些團友至今依然有聯絡，可以做到朋友。住camp site也是在香港、甚至自已backpacking都未必得到的難得體驗。既然今次又係要去歐洲，又係要跟團，就決定再次參加學聯的巴士團，讓兩老體驗一下歐州的camp site生活，讓我自己懷緬一下那些年的巴士團青蔥歲月，而且團費又冇咁貴呢 !!

那些年的巴士團青蔥歲月。我地呢張食飯相十幾年之後學聯都仲用緊來做宣傳。

不過當我打開學聯的Facebook，讀到現在的巴士團宣傳單張，我對再次參加巴士團的熱情頓時涼了一大半。大概是現在的年青人都不喜歡跟團的關係，團友全為中年或退休人士 ; 而為了遷就這些上年紀的團友，巴士團的內容也作了不少改變，例如現在團友已不用再睡在巴士上，改為睡在camp site的小屋，大多有獨立廁所，有些還有獨立廚房，比以前舒適不少; 那些年，我們每晚都睡camp site，大部份晚餐和早餐都是大家一起在camp site煮，而現在的巴士團其實有幾個晚上是在青年旅社甚至酒店留宿，19天的行程就只有4頓晚餐是在camp site 一起煮，其他晚上有時是在中餐廳吃中式團餐，有時自費。這對兩老來說是好事，但對我來說就覺得減退了不少巴士團的趣味性了。Anyway，歐洲還是要去的，團還是要跟的。永安康泰我真係參加唔落，捷旅假期我又俾唔起。中年團友就中年團友吧。學聯就學聯吧。最重要係同兩老在一起暢遊歐洲，見識世界。

跟團就是任性。既然跟團，行李不用自己日日孭住，我比平時去旅行帶多左好多衫，好省一點洗衣費及乾衣費。歐洲陽光猛烈，但歐洲街頭冇人擔遮。為了搣甩「職安真漢子」的地盤味，「街市婆」的街市味，還有本人的「麻甩系女生味」，我們特意於出發前到旺角花園街搜羅闊邊lady 帽，每人一頂，意圖增添自己的「歐洲味」，配合歐洲的優雅氣息，順便遮埋太陽。至於兩老帶去歐州的服飾就由冇份去歐洲的妹妹充當「形象指導」打點配襯。去歐洲喎! 影靚相喎!「置裝費」點都要花一D。