一個人的俄羅斯之旅第一天已有很大的挑戰。從香港飛往聖彼得堡的俄航客機要在莫斯科轉機。
我一時大意, 挑了一班只有個半鐘頭轉機時間的航班, 以為轉機很簡單，
落機後在禁區找到第二班機的閘口就可以。後來在網上討論區搵旅遊資料才如夢初醒，原來在莫斯科轉機到聖彼得堡時是要先在莫斯科國際機場辦入境手續和過海關,再出禁區轉無人駕駛列車到另一個Terminal， 再過安檢才登機。要在短短個半鐘完成以上步驟，
就算頭一班機不delay 也相當有難度， 害得我整個人在出發前神經兮兮，非常擔心轉唔切機。 俄航出名服務差，又言語不通，如果趕唔到班機相信都會幾麻煩。
為左儘量趕到班機，雖然兩程機都做左online check-in, 但都早啲去機場問吓有冇得再坐前啲，地勤哥哥俾左19號走廊位我。問佢如果去到莫斯科轉唔切機點算，佢話如果呢班機delay, 果邊嘅同事會喺閘口守候來幫我 - 呢點我相當懷疑。
香港飛莫斯科的航班雖然有中文及英文廣播，但中文聽起上來像含著水在說話，一句也聽不懂; 英文口音極重，同樣聽唔明；電影多沒有字幕，香港電影就只有逆流大叔，但普通話配音加英文字幕，D國語配音仲要勁捲脷，之後睇「A star is born」，是少數有英文字幕的電影, 再之後選了很久都找不到有字幕又有興趣的電影， 回程應該會好難捱。
不顧形象往前跑
忐忑左成程機，終於到左最緊張的落機時刻。班機冇delay, 但落機已四點半，下一班機的boarding time是5:35, 時間不多， 我也不顧形象 ，飛機一停仲未熄安全帶燈我已經行左出機門，係經濟艙的第一個。但原來做第一個都幫助不大。因為架機唔係靠terminal 停，仲要轉shuttle bus。由架機停低到等啲頭等客落機再到載我地經濟艙乘客架shuttle bus 埋站都已經搞左半個鐘。 我只剩下半小時。
我企定在Shuttle bus門口， 一開門就跑落車，好彩原來落車個位離過關個位好近，幾步就到。同木口木面的保安員講我要趕下班機，佢示意我排外交人員果條短啲嘅隊。過關都算快 - 雖然個濃妝女關員黑口黑面。
過完入境果關再過海關，幸運地冇乜人。因為寄艙行李不用跟身，我冇乜行李喺身，所以海關都冇乜留難我，好快俾我過。
時間只係淨番20分鐘。一出禁區，我就按住「背包客棧俄羅斯討論區」的轉機攻略指示係咁跑。由國際航班的Terminal F 去轉機到聖彼德堡的Terminal B，要坐無人駕駛列車，列車離禁區有啲距離，我拼命跑，竟然喺出名凍嘅俄羅斯跑到出晒汗，背脊都濕埋。
五點三終於跑到Terminal B, 但唔知邊個gate, 仲要再過安檢。Terminal B 的指示牌是king size, 一埋俄文，一時間我都搵唔到我班機喺邊個閘登機，決定唔理咁多，過左安檢再算。過安檢前要scan 左張登機證先可以入閘，但部機好唔 sensitive， 好多人都唔scan到，真係急死我；
仲有10分鐘，終於俾我入到去安檢，個檢查員竟然玩野，要我打開個袋，話懷疑有spray 。 我沒好氣打開個袋俾佢睇。佢亦都搵唔到spray.
終於過埋安檢， 喺禁區內的指示牌搵到個閘口，竟然在最入的126閘口， 預計路程要十分鐘，fuck!! 雖然呢個terminal 設計摩登時尚，但我又要繼續跑，已經無心欣賞了。
半跑半行 (已經冇氣力再不停跑）咁仆到去Gate126， 終於俾我喺五點半到達，完成今次創舉。仲有五分鐘可以去屙埋督尿。
趕餐死，終於都俾我趕到去Gate126轉機。
去到聖彼得堡，本來都擔心今次轉機就算個人趕得到，D寄艙行李都趕唔到。等到同機乘客D行李都差唔多出晒，終於見到我個backpack，有驚無險。
出了閘就去找ATM提款, 之後搵小巴出市區。本來有想過如果天黑到步就call yandex taxi, 但此時天仍光，加上遇到同機的香港人同路， 就一起去坐小巴轉地鐵了。
出發前在討論區看過不少遊客在俄羅斯火車站/地鐵站被搶的經歷令我提心呆膽， 將當年去南美用的防盗裝備都派上用場，以防萬一。但從機場出來的小巴上所見，聖彼德堡市容整潔，也有不少人獨自在公園跑步或蹓狗，怎也不似治安差吧 ？
來到地鐵站，嘗試用售票機買儲值卡但買唔到，只好排counter。剛好有張海報介紹儲值卡，就用手機拍了照show俾售票員睇，成功用身體語言買了卡。
在地鐵內跟剛才在機場認識的香港人分別，又再一個人上路。聖彼得堡的地鐵車箱有英文字幕提醒下個站是什麼，出站後也有少量英文提示，但不足令我找到正確的出口去hostel, 結果又係要用google map搵路。
手忙腳亂之下步出地鐵口。上到地面第一眼就見到洋蔥頭教堂。好俄羅斯呀!! 好興奮!!
出地鐵後上到地面第一眼。
用google map搵hostel。hostel 門口非常低調，只在大閘門上貼了一張A4紙notice就算，害我行到過晒隆都不知道。
在hostel安頓好已經是當地時間十一點， 香港時間深夜四點。沖完涼就即刻去瞓了。
聖彼得堡的Baby Lemonade hostel，Lobby像disco，廚房又很俄羅斯。乾淨舒適。
沒有留言:
張貼留言