聞說，世間上最毒的事情就是一個人去主題公園。
拜武肺所賜，無得去旅行又要清假，趁生日有免費飛，加上唔知出年海洋公園仲捱唔捱得住，我決定不理家人的恥笑及世俗嘅眼光，一個人去海洋公園玩機動遊戲。
在山腳看完熊貓後就上山。一個人來坐纜車好似有啲老尷，畢竟你前後左右的乘客都會見到你係一條友。有諗過坐火車上去算，只是，都唔知會唔會係最後一次來海洋公園，都係坐纜車吧。
平時同家人或朋友去海洋公園都無為意，原來一個人去海洋公園嘅人都唔少。排隊坐纜車時，前面兩個中年男人都係單丁。纜車站職員會為剛登上纜車的乘客拍合照，沖曬後在山上的小店售賣。盡責的女員工拿著相機向剛登上纜車的我招手，但係我得一條友，影乜鬼嘢吖！唯有低下頭扮搵嘢，避免尷尬。
