一條友去海洋公園摘記

聞說，世間上最毒的事情就是一個人去主題公園。

拜武肺所賜，無得去旅行又要清假，趁生日有免費飛，加上唔知出年海洋公園仲捱唔捱得住，我決定不理家人的恥笑及世俗嘅眼光，一個人去海洋公園玩機動遊戲。

在山腳看完熊貓後就上山。一個人來坐纜車好似有啲老尷，畢竟你前後左右的乘客都會見到你係一條友。有諗過坐火車上去算，只是，都唔知會唔會係最後一次來海洋公園，都係坐纜車吧。

平時同家人或朋友去海洋公園都無為意，原來一個人去海洋公園嘅人都唔少。排隊坐纜車時，前面兩個中年男人都係單丁。纜車站職員會為剛登上纜車的乘客拍合照，沖曬後在山上的小店售賣。盡責的女員工拿著相機向剛登上纜車的我招手，但係我得一條友，影乜鬼嘢吖！唯有低下頭扮搵嘢，避免尷尬。

在纜車上，對面線落山的纜車乘客中也有不少單丁的老年人。時為中午十二點左右，這些老人為什麼咁早就一個人落山？是拿著老人免費飛來兜風的街坊嗎？

一個人坐纜車其實有啲驚，尤其當纜車向下俯衝時。

下了纜車，直往最近纜車站的「動感快車」去。是為海洋公園中最刺激的過山車。可能因為門檻高，而且疫情期間人流又少，我果班車只有四個人。對上果班車更只有兩個人。車上四人連埋我都是女生，似乎都是「專業」的海洋公園玩家。大家全程都無尖叫，安靜得好比在日本坐火車。我是在玩過山車嗎？

之後直奔最刺激的「翻天覆地」，只是，今日竟然關閉！我本來最期待就是翻天覆地了。點解咁對我？？

玩唔到翻天覆地，就去對面的「超速旋風」。是為低門檻、「條條Fing睇風景」級數的機動遊戲，所以排隊的人比較多。因疫情關係，乘客只能坐單數的車卡。可是，當我放好背囊想搵番個位時，發現所有單數車卡都坐滿。只好拎番背囊番轉頭排隊玩下一班，柒咗。有中學男生玩嘢，爆粗大叫「嘩真係好撚驚呀！」。

「雷霆接拍」：即係兩個人一卡、極速氹氹轉果個。平時兩個人一齊玩玩互相撞來撞去再傻笑，係好玩嘅。但一條友玩，冇人同自己撞來撞去，有啲無癮。

「海洋劇場」：是為海洋公園內人氣最盛的景點，終於都有來到海洋公園的熱鬧感覺。只是表演項目我由細睇到大，十年如一日，跟我小學時睇的其實差不多，仲要少咗已過生的殺人鯨威威，老實說我覺得有點厭倦，目光也不禁從台下努力表演的海豚轉移到海洋劇場後的新game 「狂野龍捲風」。

「海盜船」：低門檻之選，本來諗住skip, 但行過見唔使排隊就來玩吓。雖然人不多，但因有一班中學女生尖叫，倒是有點氣氛。

一刻鐘的朋友
「狂野龍捲風」：遠觀相當驚嚇，卻又令人相當期待，會自轉同公轉。因為夠刺激，門檻高，所以冇乜人敢玩，排隊時只有我跟另一位同樣是一個人來的女孩。由於有點拗底，有諗過搭訕叫個女仔同我一齊坐。沒想到個女仔同樣拗底，先開口問可唔可以坐我隔離，當然歡迎。就這樣我們成了一刻鐘的朋友，一起玩龍捲風。老實說都幾驚，大部分時間都倒轉個人見到個海，我終於都嚇到尖叫。如果真係一個人玩的話係會超驚。

「跳樓機」： 我跟新相識的一刻鐘朋友來到了跳樓機入口，但入口螢光幕寫住關閉，以為無得玩，點知見到幾個鬼仔鬼妹玩完出來，問他們跳樓機入口是否這裡，佢哋話係呢度，於是照入。結果當然又係得我地兩個人包場。我跟職員說入口螢光幕寫住關閉搞到無人來玩，職員才恍然大悟。「跳樓機」又係一個人玩會拗底的機動遊戲。好彩有一刻鐘的朋友互相「扶持」。

一刻鐘朋友已經玩晒想玩的機動遊戲，打算走了。我仲想玩埋最懷舊的「瘋狂過山車」，就這樣跟一刻鐘的朋友說再見。

記得十歲時第一次同老豆、細佬玩過山車，感覺非常過癮，前所未有咁刺激，玩完要即刻encore，但老豆玩到咬損自己條痢，唔肯陪我哋再玩。依家幾十歲人，「身經百戰」，「瘋狂過山車」已不再令我瘋狂。只是接連玩了龍捲風、跳樓機同過山車，我的頭髮已經鬆散得有如瘋婦。由於越礦飛車冇得玩，玩完瘋狂過山車，決定歸家去。

雖然充斥住大陸遊客的海洋公園令人煩厭，但今日門庭冷落、缺乏人氣、連過山車都沒有尖叫聲的海洋公園又好像沒有令我感到很高興。

過去海洋公園帶給了我歡樂的童年回憶，今天我感覺海洋公園已是個食老本、垂垂老矣的老人，失去了昔日的朝氣。曾經海洋公園帶給我們這麼多，但今天就連我這個老顧客也說不出我是否希望政府再倒錢落海，資助海洋公園繼續營運。

香港每日都在變。一年後，海洋公園跟香港人的命運會如何，實猜不透。

一條友去海洋公園之寂寞好比相中的熊猫