背包遊高加索 [十] - Juta Valley - 入住Zeta Camping 小木屋 及 Chaukhi Lake

Juta Valley 的山上有兩家很Chill 很搶手的住宿 ，分別是較昂貴的 Fifth Season 及價錢較親民的 Zeta Caming，可以camping 或入住小木屋多人間。戰友Tak 睇過網上一些Zeta Camping的照片後就「中左毒」話要去 camping。佢話camping 比住木屋型，而且「天為被，地為床，人在野的感覺」好正。

對於戰友Tak 對 camping 的浪漫化想像，我只能提醒佢在高原山區 camping 「好天就享受，落雨就仆街」。話晒Juta Valley 為處高原山區。根據以往在高原山區旅行的經驗，高原山區早上以外的時間天氣多數不穩定，一日可以經歷春夏秋冬，落雨機會好大。我同意campng 係型D，但我一把年紀，唔介意柒。

最後 Tak 都肯妥協，我們 book 了一晚 Zeta Camping的小木屋多人間。

從位於 Juta Valley 山腳 的 Loli’s Hostel 步行不到半小時就到達 Zeta Camping。當天早上風和日麗，到達 時都覺得環境很 Chill 很寫意，就算唔去行山就咁留在旅館 Hea 也相當不錯。但我們只book 到一晚住宿。趁陽光正好，忙把未乾的衣物晾在旅館的晾衣架上，再準備登上距離旅館只是 3 km 的 Chaukhi Lake 看冰川。 

 

圖左上: 從Loli’s Hostel 步行上Zeta Camping

其他照片 : Zeta Camping的戶外設施

出發時還是風和日麗，但行行吓天上烏雲愈來愈多，預計回程時有機會落雨。路上碰到的人多是相反方向的。似乎大家都是一早出發，中午回程。

山路不算崎嶇，直到遇上一條結了冰的河。過河是必須的，面積不細，但此時已是夏季，我們無從判斷冰河是否安全通行。一直在冰面邊緣猶豫，直到見到其他遊客毫不猶豫地過河才敢戰戰兢兢走落去。

前往Chaukhi Lake 的路上 

行得快又驚跣，行得慢又驚D冰會裂。淆晒底之下，終於都過了冰河，

我們躡手躡腳過冰河的窘態

不久就來到終點 Chaukhi Lake。湖面不大，但被四周雄偉雪山包圍，令人心曠神怡。湖面望向雪山方向依然藍天白雲，但望番回程條路，天空風起雲湧，似乎很快會落大雨，我們也不敢久留，在湖邊拍了些照片就趕快回程。我地仲晾左D衫喺旅館，要番去收衫呀!! 

@ Chaukhi Lake

欲速則不達，雖然心想快D番旅館收衫，但山路有碎石又有冰，唔係想快就快得到。戰友Tak 腳程較快，無我咁怕跣，就叫佢行快D跑番去收衫先，我繼續用安全速度後上。走到距離旅館幾分鐘路程的另一家旅館 Fifth Season，雨終於落下來。走入去避左一陣雨，趁雨勢稍為收細再趕回 Zeta Camping。

終於回到我們入住的多人間小木屋，同房的其他住客未到，我們就利用暖爐將濕了的衣物烘乾。坐在溫暖的小木屋內望著窗外camping 的其他住客，不禁幸災樂禍地覺得自己冇book camping真係太明智。哈哈!

雨一直都沒有停，我們就在旅館的型格common room 暨餐廳 hea 打發時間，沒有再出去了。這家餐廳食物選擇多，價錢也合理，比昨夜在 Loli’s Hostel 的膳食好多了。唯一缺點是沖涼間太少，得一格。而且為於室外，落雨出去沖涼會有D狼狽。

@Zeta Camping 小木屋多人間及型格餐廳

傍晚時份，我們的同房終於出現。竟然是一對中年瑞士夫婦及他們的導遊。瑞士夫婦參加了為期兩星期的Georgia + Armenia 的 私人hiking tour ，剛從亞美尼亞過來。我跟他們說我們之所以來 Georgia，就是因為 Georgia  = 便宜版的瑞士。對於有瑞士人來 Georgia旅行實在有點意外。瑞士夫婦覺得這裡的風景也很漂亮，亞美尼亞很 yellow ，Georgia很 green，的確跟瑞士有點相似。問他們到了哪些地方行山，他們想了良久都說不出來。這裡的地方名實在比較難記。

明天就要從這個美麗但偏遠的山區回到城市，向亞美尼亞的首都 Yerevan 進發!!

圖左上: 自助早餐@ Zeta Camping

圖橫中排 : 因為大部份時間都落雨，我地都冇機會在Zeta Camping的戶外範圍chill 過，只能在臨走前扮晒 Chill 影番張相。

圖橫下排 : 揹晒所有家檔落山去，向亞美尼亞出發。