吹水篇

尋晚發左個怪夢 (其實我成日都發怪夢，會刻意記住d夢)，夢見我同父母細妹(細佬例牌冇份，呢個point好真實)番大陸自助旅行，點知細妹自己早左落車，我同老豆阿媽即刻落車搵佢，搵到天光，終於0係一處荒野聽到佢d哭聲，終於搵番佢。

你一定以為我細妹好細個。其實佢已經十八歲，仲攞埋成人身份証。不過我地屋企絕對唔會當佢18歲，更加唔會當佢成人看待。俗語話么仔/么女么心肝不無道理。好似我細妹，比我小六歲，比我細佬小5歲，成家人都由細睇到佢大，睇住佢出世0係醫院帶番來，睇住佢學講野，睇住佢學行，睇住佢番學，睇住佢又用奶瓶飲奶到用水杯飲奶 (ps: 佢四年班先戒奶，十分恐怖)，要我當佢係一個大人，實在做唔到。對於我父母，我細妹更是惟一一個由細俾佢地湊到大的子女。因為我同細佬細個時有一段時間0係大陸俾我婆婆照顧。可能因為咁，睇得出我阿媽最唔放心的係我細妹。我細妹讀到小學，我阿媽依然會每晚走去佢床邊睇佢有冇蓋好被，佢去夜街一定會打俾佢問佢幾時番。

做么仔/么女可能會感到好煩，不過其實很幸福。

*******************************************************************************

前日同事買了兒時欣物 - 彩虹糖回公司，勾起了大家很多兒時回憶‧根據調查，我小時候係咁多同事之中最窮的一個，因為我小學時沒有零用錢。同事奇怪我怎可能沒有零用錢。其實我當時冇諗過自己點解冇零用錢，反而奇怪點解人地有零用錢。小學時好多同學話我孤寒，其實我根本就冇錢，每年就只有新年那幾百蚊利是收入。既然冇錢，何來闊佬呢?

中學因為要自己食飯，所以終於有零用錢，每日廿蚊。當時一個m記餐大約17/ 18蚊，茶餐廳一個set lunch都係17/18蚊，我每日食完飯，只係儲到兩三蚊，放假更加唔會有零用錢。實在買唔起一本13蚊的 ，一枝四十幾蚊的hello kitty兩用筆，or 一個五十幾蚊的公仔筆袋。幸好班上買 的同學多的是，總有機會睇小小，未至太out。預科時，零用錢增至廿五蚊一天，至大學，增到三十蚊一天。由於大學canteen一個餐只係十零蚊，手頭比較鬆動，偶爾可以同同學食貴小小。

由於讀書時經常徘徊於貧窮線邊緣，使一蚊一毫都諗得清清楚楚，所以由細到大都俾人話我孤寒。其實你地怪錯我了。我只係應使得使。事實上，我雖然窮，不過我也有快樂的童年。

阿媽用同樣的財務政策apply落我細佬度，不過我細佬卻成為了搵一蚊使兩蚊的大花筒，未能承繼我的優良傳統。

*****************************************************************************

星期五放工，本來想同生日的同事一起慶祝，不過佢番左屋企，唔肯出來。我地幾個便到outback steakhouse隔空幫佢慶祝。原來爛蒲爛飲又食煙的同事馬田好介意人地話佢唔乖，我惟有叫大家乾杯，緩和氣氛。