習慣沒有蘋果的日子

我大概由初中開始已經睇<蘋果>，當時<蘋果>還未有網上版。放學做完功課，焦急地等待老豆放工回家，我等待的不是我老豆，而是他買來的<蘋果日報>。老豆番到屋企人未坐低，我就會打開老豆的返工背囊，掏出裡面的<蘋果>，再抽出娛樂版及副刊細閱。他本來睇<天天>或<東方>，轉買<蘋果>完全是因為他聽說<蘋果>的馬經貼士較準，跟政治立場無關。對於他這個決定我無任歡迎。因為<蘋果>全彩色印刷，排版精美，娛樂版及副刊內容豐富，而且紙和墨的質素較佳唔甩色，睇完對手唔會成手墨。

那時的娛樂版份量十足，當<天天>或<東方>的娛樂版只有一兩版時，<蘋果>的娛樂版是一大疊。娛樂版除左有娛樂明星資訊，仲有一整版專講名媛紳士BALL場無聊八卦消息、介紹闊太們的名牌手袋衣物，令我這個成長於北區的「鄉下妹」都識得咩野係 Prada同 Dior ; 副刊的「名采」專欄作家更是粒粒皆星，有林振強、張小嫻、陶傑、蔡瀾、林夕、李碧華及我中學時最喜歡的區樂民。半小時的讀報時光，我花九成時間睇娛樂版和副刊，再用一成時間極速瀏覽港聞及國際新聞。那時是 <蘋果> 最輝煌的年代，也是我記憶中香港最繁華的好時光。

為了應付學校的家課，在學校多訂了<明報>及<南華早報>。當年<蘋果>的名聲不太好，為了維持我好學生的形象，剪報功課不能用<蘋果>。但<明報>及<南早>就真的只是為了交功課，從來不會細閱。每天睇得最開心的依然是 <蘋果>。<蘋果>是我應付讀書考試壓力的精神食糧。

後來老豆再次因為馬經貼士的原因而轉睇 <東方>。但唔緊要，因為<蘋果>已經出左網上版，仲可以免費任睇。畢業後去澳洲working holiday，一年不在香港，上網冇依家咁方便，一有機會上網就會狂煲<蘋果>，追看香港新聞，好讓自己不太脫節，也可以一解鄉愁。

再後來當了打工仔，每天下班坐火車回家的三十多分鐘車程就靠 <蘋果> 來支持。擠在迫滿了上班族、自由行旅客、行李喼及開大speaker用各省市鄉音跟親朋戚友微信的大媽大叔的東鐵車箱中，<蘋果> 可以讓我「隔離」一下自己，令車程不致太難過。而我亦由主力睇娛樂版變成睇港聞。隨住香港社會變得愈來愈荒誕，港聞比娛樂版更具娛樂性。況且，香港已經沒有明星了。

<蘋果>陪伴我由學生妹變成中女。見證<蘋果>就這樣突然完結，令人難過。我要學習習慣沒有<蘋果>的日子。而習慣以前不習慣的，恐怕會成了我等留下來的香港人的生活日常。