Lingwhatever's blog: Family Trip - 初冬花蓮自由行 (一)

距離6月去新疆我已經半年冇去過旅行，係時候「出國」透一透氣。這個12月相當精彩，月頭同屋企人去花蓮自由行6天之後我就會一個人去緬甸旅行10日了。

「柒柒地」的小領隊

今次又係我硬食「小領隊」呢個吃力不討好的職位。又要plan身行程又要幫大家搞入台證。上次一家人去台中我張入台證打錯左自己個英文名，搞到要俾錢另搞落地簽證 ; 估唔到今次又係入台證出事，受害人係我細佬，我打錯左佢個passport no.。好在台灣入境人員認為係minor mistake，佢地喺我細佬張入台證改番個passport no. 再喺上面蓋個章簽個名就放走左佢。我明明double check 過D data先submit，今次細佬出事，只怪佢唔好彩。哈哈!!

出左禁區去提款時又蝦碌。明明出左卡又出左錢就走，點知原來咁都仲係「交易未完成」，搞到排我後面的細妹提唔到錢。去對面「大哥大」搞電話卡，都搞左好耐，搞搞吓後面好多人排隊。

跟住買巴士飛去火車站。見國光客運隔離間巴士公司 (好似叫飛狗) 冇人排隊就去買。五個人七百幾蚊，個大媽職員幾熱情又同我地講幾句廣東話。點知中左伏。先係等左好耐先上到車出城，去到市區，又要拎埋D行李轉第二架巴士，坐左幾個站先到火車站。又柒左。

到左火車站先一點。由於台北去花蓮的火車票出名難買，所以之前已經在網上訂了票。但我們比預期早左到，想換早點出發的車票又換唔到，只好照原訂計劃坐三點四的車。上火車站 food court食飯但啲野麻麻地，又唔平，都要一百八一個餐

台灣的第一餐飯@台北火車站

上火車不久全家瞓著，瞓瞓吓半醒時驚見外面是太平洋海岸即唔敢瞓。我想拍醒細妹叫佢睇浪但條友釣魚釣到個頭九十度，拍極都冇反應，當時未到宜蘭但雨大，好在之後都冇落雨只係多雲。

到花蓮時已天黑。到遊客中心打聽買明天去太魯閤的「台灣好行」巴士資料，原來要過對面客運站買。客運站阿叔叫我地聽日先來買，但我們今晚住七星潭，明早會在七星潭上車，那邊買不到「台灣好行」車票，於是佢破例埋左今日條數，再賣車票俾我地。

五點八回火車站搵七星潭渡假飯店的職員返酒店。駛往七星潭的路上都是黑猛猛，來到旅館最燈火通明。酒店比想像中好，有希臘式cafe任飲咖啡及高山烏龍，房又夠光猛，仲有個小露台，可惜家庭房冇海景，但側面都見到海，雖然黑晒都見到好大浪。

接車小子介紹的鎮上惟一的快炒店七星客棧，（另一家食肆食海鮮），意外的雅緻好食，老闆娘手勢好，阿女都招待甚熱情。嘗了曼波魚炒菜骨膠原及炸魚排，都好好食，一家都食得好開心，甚至覺得聽唔使去花蓮夜市，可以encore呢間小店。

七星客棧堅係食得過

一人一條香蕉

食飽先去對面 family mart 買蕉食，再循餐廳阿女介紹的單車徑散步，但風很大又太黑，散不了多久就回family mart 買乾糧，回旅店cafe影相排隊沖涼，上天台望望，我等左個幾鐘先有得沖涼，十點前全家都瞓了。太累。

七星潭渡假飯店的希臘feel cafe，可以24小時任像即磨咖啡及高山烏龍茶

第二日要坐八點十分車去太魯閣，我同老豆六點起身想去海邊睇日出，但多雲兼風大，沒待很久。

太平洋日出，冇太陽，好大風

七點就食早餐，以為其他屋企人去左食早餐，原來上左天台睇海。早餐豐富，有煎蛋薯餅多款饅頭栗米湯，但冇乜殿粉質，咖啡不好喝，好快又肚餓。

半個鐘唔使大家食完早餐出 family mart買飯團，偷了些時間去睇海。天色轉晴比今早更美。

八點坐旅館車去巴士站坐「台灣好行」，其實好近但職員尋晚話驚我們搵唔到，主動要開車送我們去，實在係太體貼。巴士遲左幾分鐘，八成滿，仲有老外等車時見對面有戰機飛過。

坐「台灣好行」便宜遊太魯閣

第一個景點砂卡璫撞正一個耆英團，頭段好多人行唔快，至尾段才可正常走。但因趕下班車，未行晒就要回頭番巴士站；

第二個景點布洛灣，掙扎是否落車，但大家似乎累又想去廁所，結果錯誤決定，步道廢，又行唔到去下一個站燕子口。由於下一班車要等一個鐘，實在無野做，所以入左去電影院睇紀錄片。點知整個電影院就只有我們一家人，我們一家包了場。

布洛灣步道的 look out

布洛灣的電影院俾我地一家包左場

第三個景點燕子口是太魯閤的重頭戲。跟團或包車來的人都戴上了頭盔。但我等一眾坐台灣好行來的散客都沒有看見借頭盔的地方，只好冒住「生命危險」遊燕子口。

燕子口車站同樣是錐麓步道的入口。好想有機會行吓錐麓步道

行左幾個鐘已經肚餓。一人一條腸醫肚。

第四個下車點是綠水，打算走綠水-合流步道。被中醫師評為「超級虛」的細佬決定放棄，其他人照行。儘管個人認為綠水-合流步道景色也不錯，但看了大半天太魯閤的景色，大家似乎都有點審美疲勞，提不起勁。

阿媽驚細妹俾水滴濕，幫佢開遮。喺阿媽心目中我地永遠都係細路仔。

走畢綠水步道，大家都覺得行夠了，係時間出花蓮市搵吃的。

行完綠水步道在巴士站的博物館休息，唔係參觀。

等巴士出城

感覺坐「台灣好行」遊太魯閣不夠方便。因為班次實在太疏，而步道都是單向，為了趕車，好多步道未行晒就要走回頭路趕下一班車去下一個站。跟家人在一起「扶老攜幼」亦不能走較耗時但聽說更壯麗的錐麓步道和白楊步道。如果有去花蓮的便宜機票，希望可以跟山友去行吓錐麓步道和白楊步道。

只載4人的花蓮6人的士

搵的士去花蓮夜市附近。雖然花蓮市通街都係可坐6人的計程車，奇怪的是很多司機都不願意載超過4個人，原因不明。我們一家5口搵的士，第一次就食了檸檬，司機要我們分兩架車坐。問第二架車，今次係個女司機。佢最初都不太想做我地生意，猶豫了一陣子，最終肯應承，落車幫我們推門中排的座位，再打開後座的門。問女司機為什麼這裡的司機不肯載五人，是不是犯法，女司機說大家只是覺得問後座的門很麻煩。因為怕麻煩而不做五個人的生意，花蓮市的士司機的經濟哲學真的讓人摸不著頭腦。既然女司機不怕麻煩，我就打蛇隨棍上，問佢可唔可以夜晚從夜市載我地返七星潭，女司機說她快下班，不能載我們了。