今年實在去旅行去得太少。至從4月去完尼泊爾行山之後一直到11月先有機會離開香港。來到11月尾，終於可以暫時放下疑似中風的陰霾，跟家人到東京近郊看紅葉。愛好shopping的細妹同阿媽已經比我地早左一個weekend飛左過去，我同老豆因為工作關係星期一夜晚坐夜機過去會合。
11月20日星期一7:40pm放工坐地鐵去青衣轉機鐵 ,45分鐘就到機場。做開貧賤backpacker的我從來都冇坐過機鐵。今次因為趕時間而第一次坐。雖然好快，但原本真係冇乜人坐，成架車都唔知有冇30個人。機場的機鐵站原來一邊月台係 T1, 一邊係 T2, 好聰明的設計‘
老豆仲有成個鐘先到所以一個人在 T2行左陣,先發現樓上有好多食肆同竟然有12蚊店。買左個頸枕上機用。
同老豆寄行李,原來只有八公斤。上機後戴了耳塞及用口罩當眼罩用,果然有助睡眠,成功瞓左一半機程。
四點幾到東京羽田機場。比起好臨時的成田三號機場,呢度「四正」好多。行左好耐先到過關處。不過當時冇乜其他機,所以好快過到關。
出禁區後搵京急電鐵站買飛去新宿。夜機後個腦塞左唔識買飛，於是向一直站在售票機協助遊客買飛的大使尋求協助。呢位識普通話的哥哥仔非常熟手地三兩吓手勢就幫我買左2張「日本八達通」 pasmo。
我地早上五點已經上左車。咁早架車都已經有上班一族。架車比較舊,冇字幕,，要靠自己睇住出面月台D站名先唔會落錯站，所以我都,唔敢恰眼瞓。半小時後去到品川站轉JR去久違的新宿站。去到新宿，我想買定去箱根的浪漫特急車票,本來仲驚住新宿站成座迷宮咁，搵唔到小田急個售票處。點知竟然誤打誤撞一出閘就見到小田急。用售票機買左八點十的浪漫特屋企急就去搵都營地鐵站番「屋企」 (我們在新宿附近的airbnb民宿) 會合阿媽同細妹。沒有方向感的我們只能跟住指示走。點知行行吓好白痴地在同一個JR站又出過閘,;都唔知有冇扣到錢。
八點順利番到「屋企」會合媽妹。「屋企」真係細左啲。放左床都冇位行。媽可能見到我地太興奮，同老豆落街買早餐都冇戴假牙。之後去箱根都一直唔記得戴，害得她拍照都不敢張開嘴。我攤在床上小休。我們沒有在「屋企」多作停留。吃了早餐就趕去新宿JR站坐火車去箱根了。
上左其實一D都唔浪漫的「浪漫特急」列車先知我買的四張車飛是四個不同行的走廊座位，我們一家四口被迫分開坐四行，想必是我剛才唔夠瞓烏吓烏吓買飛之過。不過坐邊個位都好，我只需睡一睡。上車不久我已經瞓到口都張開埋，十分失儀。
無敵好天的駒之岳
十點半到箱根湯本站。先排隊在車站安排把行李寄到今晚的酒店，再在街上買點小食，坐巴士去桃園台。今日天氣出呼意料地好，我決定飯都唔食住，即日衝上我最想去的箱根景點駒之岳睇富士山。因為山上天氣變幻莫測，通常早上的天氣都比下午穩定。不過一般遊客包括我們所買的「小田急箱根pass」只有一架一小時一班的高速巴士會經過駒之岳山腳下的箱根園站，架巴士又得好少地方有得坐，所以如果唔係天氣超好，我都唔會咁折騰帶上家人去駒之岳。
去到桃園台等一小時一班的「小田急高速巴士」去箱根園。巴士比原定時間遲左十分鐘，個站又冇人等呢架車，令我有啲拗底架車係咪早走左要再等一個鐘。好在佢最後都有出現。
一點來到箱根園卻剛剛錯過了二十分鐘一班的纜車，要等到一點四先可以上山。不過當大家一上纜車見到無敵的富士山景就覺得一切都是值得。一點半上到山,雖然又凍又大風,但大家都好興奮,忘記左其實我地連午飯都未食。
由於幫我影跳躍照的人技術太遜，照片的風光背後是跳左四個字先影到一張合格的跳躍照。
從纜車看富士山已經令我們十分雀躍
圖左下: 沒有冷帽的老豆頂唔順，借左阿媽頂粉紅色女人冷帽來戴
圖右下: 山上其實又大風又凍
圖右上: 山上的陰暗角落還可以看到結了霜的草
連環錯過纜車巴士
由於影相影到過晒時間,縱然我們已經跑去纜車站，我地都是錯過了兩點四的纜車,連帶兩點八離開箱根園的巴士都錯過埋,一家人只得在箱根園的商場食住今早買的飯團呆等一小時。
坐纜車落山時選擇了看蘆之湖
再遇上吊車停駛
回到桃園台已經黃昏。本來打算坐吊車返酒店 ,但由於大涌谷噴的氣體濃度太高，吊車停駛，大批遊客排隊等接駁巴士。不過巴士安排緩慢, 車站又風涼水冷，愈夜愈凍，擔心等到天黑都番唔到酒店。等等吓巴士，竟然見到我地卜左果間酒店Green
Plaza架專車來接客,於是上前問司機可否載埋我地。此時又有一對香港couple衝出來，說自己也是住客，也想跟車番酒店。年青司機英文很破但有禮，還蹲下來用紙筆寫下我的名字和跟我說話，嚇得我也連忙蹲下來跟他說話。從其broken English中我意會到佢接完呢批客人之後會再番轉頭車我地番酒店的。我們又等了15分鐘，巴士已經輪到我地了，但酒店專車仲未見人。正猶疑該怎麼辦之際，酒店專車終於出現。我們終於趕在入黑前回到酒店。
第一次住日式溫泉酒店
回到酒店check-in，驚訝發現酒店又有操國語的職員，看來東京的中國遊客真的很多。我們訂的是四人日式山景房，瞓榻榻米，天氣好時可以看到富士山。我們來到房間已經天黑，只能隱約看見富士山。
圖左上: 房間內有一對敞門把房間隔開。我們笑說睡覺時一定要把扯鼻鼾的老豆隔到另一邊。
圖右上 : 房間的茶几在我們出外吃飯時已被酒店職員悄悄地換上榻榻米
圖左下: 房間內的小食。我一塊都未食過就俾家人食晒
尷尬跟家人泡裸湯
當初選這間溫泉酒店，完全是為了那可以看到富士山的溫泉。意想不到的是酒店的自助晚餐很好。最名貴的長腳蟹可能說是無限量供應，拎極都有。平時在香港自稱一食生冷野就屙的爸媽今次豁了出去，一人食超過十條長腳蟹，話點都要食返夠本，話之佢之後肚痛。我坐完夜機瞓唔夠，戰鬥力太弱，只吃了五六條。幸好酒店的食物衛生應該不俗，兩老同細妹食左十幾條長腳蟹都安然無恙。
圖上: 其實我地都係第一次食長腳蟹，連可以用剪刀都唔識
圖左下: 2017年度食長腳蟹最佳儀態獎得主
圖右下 : 酒店大堂晚上有現場鋼琴及小提琴表演
食飽飯，在酒店大堂聽了一會音樂表演之後就準備去泡溫泉了。之前`一個人去京都backpacking時也試過泡裸湯。當時一個人去又唔識同場的任何人，不覺得尷尬。今次同阿媽細妹一齊去泡就覺得「唔知點」。細妹之前做空姐時跟同事泡過一次裸湯，她自稱不怕尷尬 ; 阿媽出發前聲稱接受唔到唔著衫，不過人來到日本之後，心就開了，決定豁出去。就這樣我們三母女換了浴袍來到了酒店的溫泉區。為免尷尬，我著阿媽細妹別望過來，一馬當先把身上的衣服先脫光衝入煙霧迷漫的淋浴區，始才發現我的擔心是多餘。晚上的溫泉無論是室內的淋浴區還是室外溫泉區都是煙霧迷漫，根本看不清誰是誰，不過亦看不清富士山。
房間的夾萬壞掉
昨夜熬了一晚夜機的我泡過溫泉後就想睡。可是臨睡前竟然發生了一場小插曲 – 房間的夾萬竟然打不開，而我們的財物都在泡溫泉前鎖了進去。無計可施之下只好打電話給酒店職員來處理。很快就有一個男職員上來幫我們打開夾萬。男職員花了十分鐘把夾萬鎖解開。男職員不會說英語，離開前又是一輪卑躬屈膝的日式禮儀，意思大概是不好意思打搞我們之類吧。其實我們比他更不好意思。送走了男職員，我倒頭大睡，連老豆的鼻鼾聲都聽不見。
沒有留言:
張貼留言