為何要相信，這裡會有希望?

我雖然鍾意睇戲，但生性慳家，的確好少自掏腰包真金白銀入戲院睇戲。上次俾錢入場睇的已經是兩年前的 <狂舞派>，今次是 <哪一天我們會飛>，都係黃修平+陳心遙的作品。俾錢入場睇佢地有幾個原因。一係因為我好所賞的區家麟同黃明樂都不約而同0係blog上面讚套戲，尤其區家麟一句 "《哪一天我們會飛》比《我的少女時代》好睇25倍"就令人我覺得套戲唔睇唔得; 二來，我曾經0係 HKTV 集會及雨傘運動期間聽過黃修平站台說話，感覺他是個真正關心香港的有心導演，跟其他很 commercial 的港產片商業導演截然不同; 三來，這些比較本土又不太商業化的電影恐怕得不到大陸盜版網站的「青睞」，唔入戲院睇，恐怕真係無其他渠道可以睇到。與其睇台灣人的《我的少女時代》，為什麼不支持一下市場其實只係得香港咁細的本土電影《哪一天我們會飛》?


自從  《哪些年》  hit 左之後，好多青春懷舊片出現， 食正我呢個「上左年紀」、開始鍾意想當年嘅八十後影迷條水。《哪些年》同《致青春終將逝去的青春》我都睇得好投入好感慨，而《哪一天我們會飛》帶給我的是眼淚 +更多的感慨。那個有點傷感的愛情故事令人流淚 ，而一眾角色的現實與夢想的落差、對過去的懷念、對今日香港的妥協及心淡是既寫實又令人沉重。主題曲的「求時間變慢，不想迫於成長  」、「為何要相信，這裡會有希望?」我都覺得好「中」。我本來以為《哪一天我們會飛》這個戲名是抽 《哪些年》水，睇完我先明白其實「飛」是代表夢想，而「哪一天」即喻意夢想仍未實現，亦可能不會實現，但說不定「哪一天」會有實現的機會，處境就似今日的香港，和被社會迫得太緊的香港人。《哪一天我們會飛》絕對唔係一部普通青春愛情電影咁簡單。

電影中我最喜歡的一幕 : 楊千嬅在母校要學弟學妹們暫時放下什麼 「中國航天成就」壁報勞作，帶領大家嘗試真正的「飛行」。

在這個什麼都要向北望、講求「中港融合」、「和諧」的年代，港產片早已不再是拍給香港人睇的。然而很多人忘記  《哪些年》、《我的少女時代》、甚至是大陸很hit 的《港囧》裡面的懷舊情節很多都是產自很本土的香港文化、香港流行音樂、香港明星、香港電視。我們都不想香港淪為另一個中國二線城市。沒有了 HKTV，今日的香港的確很需要像《哪一天我們會飛》這裡屬於我們香港人的、有誠意的、有 heart 的電影。希望《哪一天我們會飛》這電影可以得到更多香港人的支持。

題外話 : 今早在又一城提早一小時到場買飛，已經坐到 C 行，睇到條頸有D攰。完場出字幕時，可能大家仍然很感動，冇人走。當大家還未走出電影所帶來的情緒時，戲中四位演員忽然出現謝票，令大家既驚喜又興奮，然後就是歡夫聲及掌聲。我都係第一次睇戲遇到謝票環節，原來真係好開心，亦都因為坐得夠前，謝票環節睇得好清楚，不枉我坐 C 行坐左兩個鐘。不過其實我更加希望見到黃修平+陳心遙。

延伸閱讀 : 黃修平、陳心遙 — 留住香港　記住初衷、游學修、蘇麗珊　新人殘酷物語