跟Mirror 悲喜與共 - 記Mirror Feel the Passion Concert

入坑三年，終於可以以合理距離現場睇到Mirror 12子的演出。雖然去年有兩次機會見到mirror，分別係迪士尼Fantastic Meet活動的mini concert 同埋喺會展搞嘅12怪盗分享會，但兩次的體驗都頗災難性。迪士尼那次雖然已提早兩小時去擺位，但因係唔夠早，連鏡仔條毛都睇唔到；會展果次買貴價飛坐地面S行，視線完全俾前面啲人頭同手機遮擋，只能在人頭之間的空隙窺看Mirror, 非常不享受，無mood 到一幅相都冇影到。我發誓以後唔會再坐平地位。


經歷過13次買飛失敗，今次演唱會有幸睇到兩場，極度感激中學同學徐仔。因為兩次入場都係靠佢買到原價飛。那些年我哋一個聽J Pop 一個聽Brit Pop , 無諗過大家踏入中女之年會一齊入坑做鏡粉，仲要佢仲投入過我。有徐仔，我的追星之路並不孤單😂。仲要多謝天上的徐爸爸😇。


第一場入場係1月26日Miro場。張飛本來係徐仔喺2022年Mirror 演唱會買到的$1280飛，今次補場獲分配到地獄位置Block C 。經歷上次在會展坐地面位極不愉快的體驗，我哋決定蝕幾百蚊，搵人換張$880 Blk 12 Row J的樓梯位。這張中價飛位置跟T台很近，不用zoom 都可以見到T 台上的鏡仔。雖然跟主舞台有點遠，但我哋都已經非常感恩了！！

第二場係1月30日，係徐仔幫我喺公售當日買到的$1080 Blk 3 Row S 位置。公售當日我跟家人出發到台灣旅行，無法抽身喺網上搶飛（其實就算喺香港我都好可能搶唔到）。Blk 3 位置雖無較側，而且在T台後面，鏡仔走出T台時就要睇背脊。但好處是離主舞台很近，近到我可以見到鏡仔喺台下升上來，仲多次俾舞台的煙花聲嚇親，係之前睇演唱會從未有過嘅體驗。今次我同第一次現場見Mirror 嘅細妹入場。我妹對於坐得咁近相當興奮，當見到Edan 彈住琴喺我哋面前慢慢移到台中間時更忍不住爆粗說「嘩！好撚近！！」（我當時拍緊片，不慎錄埋佢句粗口🤣）。要再一次多謝幫我哋買飛嘅徐仔😘

睇Mirror 係令人好興奮嘅事。就算我心裡多次提醒自己要放低相機好好享受當下、就算明知礙於位置及攝影器材所限，我影嘅相/拍嘅片注定係矇郁鬆，但總是按捺不住拍片影相嘅衝動，繼而唔知醜咁樣post 出來做個記錄。（喺IG 低調post 算了，反正我個IG 冇乜人睇）

好！講咁耐終於入正題講番個Concert 。

1.每場一神袐彩蛋
這實在最好的安排（係咪其他韓國男團女團演唱會都係咁？？）。既能炒熱話題，又能讓未入場嘅鏡粉望梅止渴。畢竟我要等到演唱會嘅第二個星期五先入到場，得靠每晚官方上傳到You Tube 的彩蛋片段止癮。演唱會完結，無得再每日追彩蛋將會令我很失落。

2. Jer
終於有機會現場睇到號稱全團最唱得嘅阿Jer表演。好開心可以聽到《MM7》，係我最鍾意嘅阿Jer 歌曲。同Edan 合唱《皮囊》更加係技驚四座，連帶Edan 都唱得勁咗。邊個話鏡仔唔唱得？

其實我非常喜歡2022年Mirror 演唱會中阿Jer 演繹嘅《黑夜不再來》。可惜當時只係唱左四次就無法繼續。期望可以再聽到。

Btw 阿Jer 件蘇格蘭格仔褸好靚。


2. Ian
Ian 唱live 好穩定，就算彩蛋環節亦相當有水準。就影相而言，Ian 係好好影嘅，因為佢唔點郁，比較容易對焦😂。《夜視鏡》有簡單舞步，係Ian 嘅新嘗試，不過…我都係鍾意聽佢唱慢歌多啲。Ian 我最鍾意《DWBF》，今次演唱會喺彩蛋環節出現並同AK 合唱係好正。

3. AK
個人覺得AK 聲底比較薄，同佢比較Man 嘅歌路唔係好match. 但Ian 寫俾佢嘅《blue monkey 》就好啱佢唱。而且AK 係有舞台魅力嘅。果種帶點玩世不恭又有點壞男孩嘅氣質好charm。唔夠佢靚仔係做唔嚟。

4.Stanley
大表波 x Jeremy 果part 充滿話題性，不過我坐樓梯位，大表哥嘅胸肌我其實唔係睇得太清楚😅😅

反而想講Stanley紀念亡母嘅《來下及》。第一次現場聽Stanley 一本正經地唱，配合埋背景的舊照片，我的確有被觸動到。誰會想到一向風趣幽默、很會照顧人、「渾身充滿表哥氣息」嘅Stanley 年紀尚輕就失去了雙親？他跟姜濤合唱《蒙著咀說愛你》果part 彩蛋亦相當感人，隔住個芒都睇到我眼濕濕。

Stanley 跟Tiger Jer Lokman 的《Rock 版Mirror》係演唱會我最鍾意嘅其中一part 。雖然Stanley 唱功未算很好，但彈住結他唱Rock 都幾啱佢。

5. 《人類群星閃耀時》
呢首歌都係我嘅心頭好，出咗First Take 版本之後更加鍾意。當阿Jer 同 Jeremy 唱至尾聲，其餘十個鏡仔著住白色西裝升上台一齊大合唱果一刻我震撼到睩大對眼嘩咗出聲，係演唱會其中一幕最難忘嘅畫面。

6. 教主
我同教主緣份比較深，因為我睇果兩場嘅彩蛋都係教主，有份現場唱生日歌俾教母聽。教主嘅舞台演出一向賣力，連表演嘅衫都好似特別華麗。果套同對翼一齊著嘅Blink blink 銀色戰衣blink 到影相都有啲難度，爆晒光。教主落力到連彩蛋環節都要搵一班dancer 排一part 舞一齊唱《Money》, 很有誠意，雖然個人並不太喜歡呢首歌🫢

題外話，1月30日果場show 啲神徒似乎一早收到風彩蛋會係教主，所以我哋幾乎被神徒包圍，前後左右都係神徒。當教主同大家講要唱《Money》, 我細妹竟然唔識死，情不自禁講咗句：「吓！呢首歌好撚難聽架喎！🙈」好彩啲神徒情緒高漲，時運高聽唔到😅

7. Edan
當Edan 又再熟悉地彈著鋼琴出現在舞台上，我第一個反應係「吓？又係E先生？彈咗三年喇喎？」原來後面嘅《皮囊》先係戲肉。阿Jer 唱到唔出奇，但Edan 都唱到仲要唱足16場實在教人意外。Edan 生日場的彩蛋係最touching 的一個。先是調皮地要大家為他唱生日歌，繼而分享粉絲家人/朋友請求他錄音留言幫患病的粉絲加油打氣的感受與難過，並為一位半年內不幸喪夫患癌的媽媽打氣。原來一向綜藝感十足兼號稱沒有淚腺嘅Edan 作深情分享可以咁有感染力。

8. Jeremy
我承認由《全民造星》開始Jeremy 一直唔係我杯茶。還記得當時Jeremy 自稱職業係「練習生」，但原來只係自己喺屋企練習，並非under 任何公司，實在令人啼笑皆非。但加入Mirror 後Jeremy 的努力實在令人另眼相看。從Jeremy 被派選跟Jer 參與第一條《First Take》片、主唱團歌難度較高嘅部份、擔任第一場演唱會彩蛋主角等等就知Jeremy嘅實力已經得到肯定。最令我佩服嘅係儘管唱live 經驗比起其他「上弦」成員唔算多，但現場睇Jeremy 跳唱都係相當穩陣， 喊住都仲唱得到。

9. Rock 版Mirror ( Lokman x Tiger x Jer x Stanley)
我本身鍾意聽Rock。當見到四子出場夾band Jam 歌兼且表現有板有眼實在很驚喜(差點忘記阿Jer 係識彈結他）。睇番2022年個演唱會rundown , 原來呢個組合當時已經出現。跪求花姐魯生考慮幫呢隊Rock版Mirror 出番首歌。

10.姜濤 （with 偏心filter 😅)
唔知姜糖會唔會有啲失望，因為姜濤出場時間真係唔多，只係唱左兩首歌同埋跟教主跳咗part短到到喉唔到肺嘅舞。同舊年精彩嘅solo concert相比，今次姜濤嘅演出對我來講記憶點唔多，反而彩蛋環節更驚喜。同Stanley 果part 我睇到真挈嘅兄弟情，佢覆述Stanley 同佢講「我話你好過出面啲人話你」，希望Stanley「以後繼續話我」睇到我眼濕濕；單人跳《鏡中鏡》果part 係勇氣同自我療傷嘅表演，正面面對自己嘅恐懼，真係估佢唔到。我以為佢單人彩蛋只會簡簡單單唱吓冧歌冧吓Fans 就算，看來我太低估姜濤的抗逆力同勇氣。正如大表哥所講，姜B個內心係強大的。

姜濤之於我，就好似睇奧運要捧港隊、亞洲盃要捧港足一樣，係無論高低起跌都會守護同行的（肉麻but true 😅）。

11. 期望有更多團歌及小組合作演出
今次睇show 雖然都好興奮，但比起舊年睇姜濤solo concert , 我得承認我嘅感受同投入感好似冇咁澎湃，這可能因為我對個別鏡仔嘅solo 歌唔夠熟識同埋團歌太少。相對上兩次Mirror 演唱會，鏡仔嘅小組合作亦都少咗。今次係團con, 我會期望可以睇到多啲鏡仔們嘅crossover。我最鍾意係阿Jer +Edan 唱《皮囊》同埋 Jer Tiger Stanley Lokman 的《Rock 版Mirror》 果part 。

網上有人反映演唱會rundown 唔夠好，未能炒熱氣氛及沒有連貫性。老實說，演唱會不同成員無間斷歌接歌雖然目不暇給，但我的確有一絲覺得有《星光熠熠耀保良》feel，有啲Chur又消化唔切 。不過我亦明白隨著各位鏡仔都出solo 兼各人風格迴異，要度一個平衡各項需要嘅團show 係mission impossible 。今次雖未完美，但完全收課。起碼我睇兩次都唔覺得悶，甚至睇第二次比第一次更enjoy 。要消化一個三小時無間斷嘅演唱會真係需要睇多幾次😂。

11. 跟Mirror 悲喜與共
2022年Mirror 演唱會那場令人心碎的意外，摧毀了一個年輕舞者嘅人生，亦摧毀了鏡仔的紅館夢。本來是慰藉香港人心靈嘅Mirror 諷刺地成為了創傷的根源。但這意外令我意識到，原來我除咗喺Mirror 身上得到快樂，亦會對他們的悲傷身同感受，悲喜與共。懂性以來迷戀過嘅中外歌手樂隊有很多。但能牽動我情緒、同喜同悲的就只有Made in Hong Kong 的Mirror。我很喜歡看他們在台上打打鬧鬧、互相取笑對方甩舞甩beat ，係真正friend 底先可以有呢種火花；也喜歡看他們在《Mirror Time》像小學雞般胡鬧嬉戲。 今次Mirror 演唱會平安順利完成，我感受到鏡仔的快樂及如釋重負。我衷心為鏡仔走出上次演唱會的傷痛、再次因演唱會得到快樂而感到高興。

無法忘記喺香港最仆街嘅時候Mirror 帶俾我嘅力量同陪伴。沒有Mirror , 我們可能已經被香港每日荒誕不斷的新聞活埋。 或者最仆街嘅時候還未到,但因為有Mirror , 我彷彿有天跌落嚟當被冚嘅勇氣。

背包遊高加索[十三] - 朝7晚11的修道院之旅 (Tatev、Khor Virap、 Noravank)

當初上網搵阿美尼亞的旅遊資料時已被Tatev修道院的照片吸引，但Tatev距離首都較遠。奈何亞美尼亞交通實在不便。如果自己住交通工具去，來回要兩三日。我們抵達亞美尼亞的第一晚就在Federation Square 看到泊在路邊的貨Van的旅行社廣告，前往Tatev的tour只係10000當地錢，即係二百蚊港幣不到，而且可以一日來回，仲去埋 Khor Virap, Noravank 等隔涉景點，非常吸引。旅行社連鋪位都冇，報名就喺貨Van報埋，感覺流流地。但同房的香港女仔話有朋友參加過，唔係流。雖然我地盡量都唔想join tour，但呢個tour性價比實在太高，亦解決左好多交通問題，故考慮咗一晚就決定參加。

愛姜濤，可能因為香港仆街太多

 

繼12 月阿根廷勇奪世界盃之後，我又經歷多一個心情亢奮、無心睡眠的晚上。今日雖然風和日麗，但實在無乜精神，什麼地方也不想去，只想好好沉澱一下思緒，寫一下大概無人想睇但我又好想寫的對姜濤演唱會及姜濤的一些感受。

背包遊高加索 [十二] - Garni Gorge六角柱岩石群、Geghard修道院 + 兩次順風車

第一天在亞美尼亞自由行，因為尋晚到步時找不到外國人可用的ATM，今朝一早要先解決錢的問題。尋晚試左幾部都㩒唔到錢，今日再用 Google Map 搵HSBC ATM先㩒到。食過午飯後決定到離市中心不遠的Garni及Geghard修道院。亞美尼亞的交通並不完善，包車比較省時方便。但反正時間充裕，我們想貼地一點坐交通工具。我們先用 Yandex Taxi Apps打的到Masiv Market的Mercedes Benz店，再找前往Garni的 Van 仔。的士有開蓬巧能，怎料司機一開就落雨，對我們尷尬地笑。轉乘前往Garni的 Van 仔，架Van仔比我們在Georgia 坐過的還要擠迫及小型，而且竟然有「企位」，比我們遲上車的三母女要企。不過車上的乘客挺守望相助的。三母女的媽媽把自己的小孩交給車上其他婦女，讓小孩坐在陌生人的大腿上，甚至有乘客幫她提行李。這情況我們在Georgia 都沒有遇到。

有趣的懷舊點心店體驗 - 新興食家

睇到蔡瀾在Youtube 拍片激賞此老店，冒名來此地道老派點心店幫襯。

轉載 - 馬傑偉教授： 寫給留下來的人

寫給留下來的人

明報 P08 星期日生活 |2941 字 |2021-07-04

文˙馬傑偉

木棉洞穿洞記

有幸坐上山友家人的私家小遊艇到西貢火石洲、甕缸、白腊等偏遠島嶼，就算唔識游水都膽粗粗穿上救生衣及蛙鞋，帶備浮板，浩浩蕩蕩 （論論盡盡）游幾十米去穿木棉洞。剛下水時甚為興奮，但我們低估了穿洞的難度。洞裡雖然水淺，但佈滿濕滑的岩石，環境昏暗，風浪亦大，隨時可能會被海水沖到石邊受傷。我們只能在洞內坐著，用身體抵擋海浪，慢慢前行。好不容易才成功穿洞，但同行的朋友擦傷小腿流血了。

我們以後小艇會在洞的另一邊接我們，但可能有溝通誤會，小艇未有開過來。雖然萬分不願意，但我們還得再次穿洞回小艇。

回程穿洞逆水而行，難度更高。戰戰兢兢在洞內坐著前進，但不時又會有海浪將我們沖後，只能在浪與浪之間的一剎間前行幾步。好不容易過了亂石群終於可以游出去，又來兩個大浪把我們捲起，喝了幾口海水，心都慌了。最終逃出生天沒有受傷或被沖走是幸運。繼上次紅石門迷路摸黑下山後，我跟山友們又經歷一次生死，變成生死次交。

習慣沒有蘋果的日子

我大概由初中開始已經睇<蘋果>，當時<蘋果>還未有網上版。放學做完功課，焦急地等待老豆放工回家，我等待的不是我老豆，而是他買來的<蘋果日報>。老豆番到屋企人未坐低，我就會打開老豆的返工背囊，掏出裡面的<蘋果>，再抽出娛樂版及副刊細閱。他本來睇<天天>或<東方>，轉買<蘋果>完全是因為他聽說<蘋果>的馬經貼士較準，跟政治立場無關。對於他這個決定我無任歡迎。因為<蘋果>全彩色印刷，排版精美，娛樂版及副刊內容豐富，而且紙和墨的質素較佳唔甩色，睇完對手唔會成手墨。

背包遊高加索 [十一] - 友善的悲情國度亞美尼亞

離開了風光如畫的 Georgia 山區，我們往高加索另一小國亞美尼亞進發。計劃行程時其實對亞美尼亞沒什麼認識及期望，只知道她是第一個基督教國家，經歷過種族滅絶大屠殺，擁有不少歷史悠久的修道院，順道一去無壞。但就在我們出發前不久，區家麟在他的網誌發佈了幾篇關於亞美尼亞的歷史及2018年4月獲得成功的和平革命，令我們對這個小國認識急增，還因此增添了幾分期待，很想去感受一下人家革命成功的喜悅。

另一種旅行 - 荔枝窩幫農 Holiday

被困香港呢兩年，努力尋求旅行感覺，使自己人生不致太空白。我對酒店staycation 不太感興趣，後來從朋友口中得知港大在荔枝窩有個「荔枝窩幫農 Holiday」計劃，可以在在農場當四天義工及在村內的老房子免費留宿，一嘗香港鄉郊生活，挺有旅行感覺，又可以重溫那些年在澳洲 working holiday 打農場工的青蔥歲月，就報名參加了。

背包遊高加索 [十] - Juta Valley - 入住Zeta Camping 小木屋 及 Chaukhi Lake

Juta Valley 的山上有兩家很Chill 很搶手的住宿 ，分別是較昂貴的 Fifth Season 及價錢較親民的 Zeta Caming，可以camping 或入住小木屋多人間。戰友Tak 睇過網上一些Zeta Camping的照片後就「中左毒」話要去 camping。佢話camping 比住木屋型，而且「天為被，地為床，人在野的感覺」好正。

對於戰友Tak 對 camping 的浪漫化想像，我只能提醒佢在高原山區 camping 「好天就享受，落雨就仆街」。話晒Juta Valley 為處高原山區。根據以往在高原山區旅行的經驗，高原山區早上以外的時間天氣多數不穩定，一日可以經歷春夏秋冬，落雨機會好大。我同意campng 係型D，但我一把年紀，唔介意柒。

最後 Tak 都肯妥協，我們 book 了一晚 Zeta Camping的小木屋多人間。