雖然嘉義YHA有早餐提供。不過花生醬/果JAM 多士呢類老外食物當然唔會適合兩老。所以我地只好放棄YHA的早餐，於晨早六點幾連職員都未prepare早餐的情況下落街搵地道早餐食。
時間太早，附近就只有一間麵檔開左。一人一碗米線。
番到hostel，兩老去廁所、執行李。我同細妹食左幾件多士。
食過早餐，別過YHA親切的職員後，我們到火車站旁邊的「台灣好行」巴士站出發，等巴士上阿里山。由於是淡季的關係，巴士公司只安排十六座小巴上山。同車有一班中年廣東自由几旅行，出發前已經在網上買了一套「台灣好行阿里山+日月潭」package，包交通住宿，抵過我們散買車票同搵旅館。
上阿里山途中的休息站
坐左三個幾鐘頭車，終於到阿里山上的風景區管理處。為左方便出入，我們選擇住在火車站附近的美麗亞旅店，純粹貪平又就腳。
由於房間未清潔，美麗亞的年輕老闆唔可以俾我地CHECK-IN住。我地放下行李，聽佢講解阿里山究竟要點玩。講講吓，年輕老闆竟然自己轉CHANNEL，講廣東話。原來老闆由細到大同父母一齊聽廣東歌、睇香港劇，仲係黎明的超級FANS，睇得多就自學了一口比不少來香港發展過的台灣藝人還要流利的廣東話。老闆連HKTV的警界線都上YOU TUBE 睇埋，係一個不折不扣的港劇迷。不過大家都同意TVB的劇愈來愈唔好睇了。都希望可以睇HKTV。
之前冇乜做功課，聽完老闆講完之後的確清晰左好多。老闆講解之餘當然不忘推銷一下晚上的螢火蟲團和日出團。只係天氣唔好，我地對於能否看到螢火蟲同日出都相當懷疑。老闆見我地一直猶疑也不再勉強，著我們先去食飯，食飽再諗。
阿里山的美麗亞旅館。
在火車站旁吃的餐廳吃了一頓相當豐富的午餐。有山豬肉、炒筍、野菜、蝦仁炒蛋，食左百幾蚊港紙。
食過午飯我們登上小火車往昭木站出發，打算從沼木站穿過森林走到神木站，路程兩小時。
我們很幸運，遇到了復古版的小火車!!
非常古典的車箱
火車行走期間，雨愈來愈大
找了火車站的工作人員幫我們拍了個合照
復古小火車就是漂亮
由於一直落雨，我地都拎出一早在香港買來的厚身雨衣，包住個人同背囊來行。怕相機整濕，但又想影相，我將相機掛在心口之餘要加個密實袋。影完相就即刻放相機入袋，又要不停抹鏡頭。好狼狽。
出發行山前的雨衣LOOK
只是，雨愈來愈大，而且冇停下來0既跡像。我地又擔遮又著雨衣，但都不能力保不濕。沒有行山鞋的爸媽對鞋好快已經入水。
來到姊妹潭，見有涼亭避雨，大家都決定來歇一會。
場雨大到呢......
等到雨稍微細一點再行，點知行唔夠幾步又大番。大到好似香港0既紅雨咁，完全唔適合郊遊。雖然沿途的老樹森林甚為壯觀，但又凍又落雨，已經無心欣賞，只係想盡快到神木火車站坐小火車走人。
強顏歡笑_第1回
強顏歡笑_第2回
強顏歡笑_第3回
強顏歡笑的背後其實是黑口黑面
我們將一d 景點skip左，以最快的路線去神木火車站。好不容易，終於捱過呢一段又凍又落雨的行程，可以坐火車番旅館。唔玩喇都唔好玩0既。都係聽朝睇吓天氣點再行過吧。
今回沒有復古版小火車了。坐普通版。
終於捱過一場惡夢一樣的雨中徒步旅程，可以笑得出。在小火車的車卡內還巧遇剛才同一班巴士的廣東遊客。大家都咁狼狽。
回到旅館休息，大家都好似有少少傷風。我都食定感昌藥打底。又凍又濕，攤 0係張有電暖顫0既床上面睇電視，真係唔多想再出去，更加唔想著果對又濕又凍0既鞋。不過因為旅店冇飯食，都係要趁天未完全黑之際出去搵食。
黃昏時間天氣更凍，估計不足十度。加埋落雨，著左羽絨都仲係感到刺骨。上阿里山真係要帶多件衫。一落雨就真係好凍。
圖上: 喜歡食狗肉的老豆在把玩來蹭飯吃的狗
圖下: 蕃茄豆腐，保暖又醒胃
沒有留言:
張貼留言