旅程第三天，繼續天未光六點半就陸續起床了。除左老豆，大家都懶床唔肯起身，包括我這個有職責冇地位的苦命導遊。不過去高尾山的火車唔似去河口湖咁疏，唔使刻意去趕車，於是大家都放慢手腳，” Mi Mi More More”搞到成九點先出門口。
我們在apps查交通資訊時已得知東京JR很多路線當日出現事故，不少火車有延誤。步行往新宿車站期間，發現不少受影響的上班族跑步趕上班。其實我們在東京的家附近都是商業大廈，每天走向新宿站都看見不少神色凝重而沉默的上班族趕返工，晚上八九點回家時又看到不少上班族放工。日本人的工作時間真的很長，難怪就算佢地冇時間做運動都仲係好瘦，就算上年紀都好好似冇乜肚腩。我們的另一個發現是東京人十分喜歡戴口罩，但戴口罩的人又不似生病。
大鑊 – 坐錯車 ???
交通apps說到高尾山最快的方法是坐京王電鐵， 但來到京王電鐵閘口先發現JR 關東PASS係唔包京王電鐵，於是改坐JR中央線去高尾站。我一直「大安旨意」以為高尾山就在高尾站，但坐坐吓JR，忽然意識到既然D旅遊指南都教人要坐京王電鐵去高尾山，咁可能真係只有京王電鐵先可以去到高尾山，高尾山有可能並不在高尾站。大鑊! 即刻上網查查，FUCK! 真係俾我估中，高尾山在京王電鐵的高尾山口站，不是在JR高尾站 !! 冷靜! 再check check，好彩JR高尾站旁邊就係京王電鐵高尾站，到時只是轉線去京王電鐵坐一個站就可以去高尾山口站，好彩好彩!!只係呢一個站張PASS唔包，要另外俾錢。
「條條FING」坐吊椅
有驚無險之下來到了高尾山口站。上山可以步行，亦可以坐纜車或吊椅，我們貪得意選擇吊椅， 單程370yens。不過吊椅上連欄杆都冇，坐上去就咁兩腳「條條FING」咁上山。這令一條友坐一架吊椅的細佬有點淆底。不過我覺得上山感覺冇咁驚，落山向下衝，視覺上應該比較可怕。
高尾山的紅葉情報是「見頃」。吊椅兩旁紅葉盛放
前面係一條友坐吊椅的細佬
畏高的阿媽一直扶住扶手唔硬放
我同細妹
論論盡盡地從仍然移動的吊椅上落地
12分鐘的吊椅之旅轉眼就過。在觀景台小休之後繼續往山頂出發，HEA住行都唔會太累。偶然下微雨，但不太影響行程。中午過後，天色更愈來愈好。
阿媽影我地。例牌總係影到好大塊地。
到山頂了!!
山頂的觀景台。能見度高時可眺望富士山。只係今日運氣一段。
回到纜車站附近吃午餐，時間尚早，決定唔坐纜車或吊椅，步行落山。不過，雖然落山的路是石屎斜路， 但由於落過雨，有D路段比較跣，阿媽唔小心滑了一交，幸冇大礙。之後大家都步步為營，唔敢行得快，結果落左山之後小腿肌肉好緊，貪靚冇著波鞋的妹妹行到腳指痛。
高尾山上的午餐
落山的大斜路
阿媽跣低過一次之後唔敢行咁快
終於落左山腳了!!
離開高尾山，細妹話要去東京JR站買明天去御殿場outlet的車票。明天我們一家五口將會分組，我同老豆屬「紅葉組」，留守東京都，主力去公園睇紅葉; 阿媽、細佬細妹係「鳩嗚組」，將遠赴離東京2小時車程的御殿場outlet 鳩嗚。車費好貴，三張來回票竟然要五百幾蚊港幣。於我而言，花幾百蚊坐幾個鐘頭車去鳩嗚係好無聊的事。但佢地鍾意無計。
回到新宿已經六點幾，又要俾時間細佬妹在JR新宿附近鳩烏。只係佢地選擇的Lumine 2 百貨公司唔岩行，比較高檔，行左半個鐘就放棄，去找吃的。走訪了附近幾個百貨公司的餐廳層，但都係食貴野。行到老豆發脾氣之後終於在小田急百貨附近的一個地鐵出口看到一條地下食街，估計係平野，即入。
食完飯，細妹話要去歌舞伎町驚安の殿堂買野。歌舞伎町跟我們住的新宿六丁目感覺截然不同。那邊都是斯文上班族番工放工的地方，好中環; 但這邊就十分市井，有不少MK打扮的年輕人流連、拉客、排傳單、食煙，好旺角。我們途經賣生果的百果園，懗然發現身邊所有的顧客都是說廣東話的，令人更加有置身旺角的感覺。東京的香港遊客未免太多了吧? 無論去到邊都總有一個0係左緊。有點討厭。本來兩老都想買生果，不過尋日佢地喺下吉田買左幾斤有排食，決定收手。
好不容易終於搵到果間乜鬼驚安の殿堂，規模比想像中小，又唔覺D野好平，大家都無乜收獲，只係細佬莫名其妙地買左個好睇唔好用的喼，都要成港幣七百幾。行完驚安の殿堂就步行番屋企了。
攝於東京「屋企」
東京「屋企」宵夜
沒有留言:
張貼留言