這天繼續分組，但阿媽會加入我地「紅葉組」，細佬細妹就繼續係「鳩嗚組」，下午會離隊鳩嗚。汲取了這幾天的經驗，考慮到東京太早天黑及兩老腳力有限，決定只去兩個明治神宮外苑及新宿御苑兩個景點。
「屋企」等lift
「屋企」外的街道 x 1
「屋企」外的街道 x 2
齊齊坐地鐵
我地「屋企」位於「西新宿五丁目」站。這個「翹口㔆手」的名字考起了兩老。每次我問他們「我地屋企喺邊個地鐵站?」都有不同答案。有時係「西宿木五目丁」，有時係「五宿目新西丁」，六個字的次序總是錯，笑到我流眼淚。就算係的細佬都只係講得出西新宿三個字。老豆話D死人日本仔改埋D名真係難明。
明治神宮外苑
八點，一家人人齊出發到青山一丁目看明治神宮外苑的銀杏並木。以為已經好早，但這天是星期六，所以一早已經有好多本地人及遊客賞銀杏並木。只是這裡的銀杏並木似乎已過了最燦爛的時期，落葉比黃葉還多。
有D日劇Feel
行到神宮外苑前有銀杏祭活動，有多個熟食攤檔賣熟食，比開始凋謝的銀杏吸引。我們都花左不少時間食。
阿媽跟這位阿嬸在言語不通下神交下成交了一些海產。
銀杏祭熟食攤檔有垃圾分類站。掉垃圾前，大家都會自律將食淨的食物跟膠盒、膠袋、紙巾、水樽、水樽蓋分類，真係分得好徹底。細佬唔知頭唔知路，將食剩D野成盒拎去掉，結果D工作人員要親手幫佢將上述D野分番類。唔知香港搞垃圾分類可唔可行呢? 我地嘅環保意識同文明程度好似未到呢個level。
原來中午的神宮外苑銀杏並木比上午更好看，陽光更充足，銀杏看來更茂盛。
離開銀杏祭活動會場，「鳩嗚組」成員細佬妹去原宿鳩嗚，我帶領兩老到新宿御苑去。
新宿御苑
未入新宿御苑已被場外的大銀杏樹吸引。
拋葉 x 1
拋葉 x 2
拋葉後傻笑
銀杏貴妃椅
幫老婆影相
新宿御苑需要收費，200
Yen，但入場的本地人及遊客依然相當多。其實新宿御苑的位置都算係市中心，土地應該好值錢。如果喺香港，恐怖已不保。我們在東京到訪過的幾個公園都很大，打理的很好，亦沒有限制遊人在草地上吃東西睡覺。一向討厭日本仔的老豆都佩服日本仔捨得將咁大塊地留來做公園。香港市中心都找不到這麼大又美麗的公園。
竟然有櫻花 !!
掉錯手信事件
逛畢新宿御苑，我帶兩老回到Day 2逛過的tokyu hands行超市買手信。兩老買左幾包餅之後覺得攰想休息，於是走上餐廳層搵地方坐低等。日本的商場跟香港一樣，冇乜地方俾人坐，我地只好在一間未有人等位的餐廳門外搵D俾人等籌既位坐低。等得無聊，阿媽話要睇睇老豆手機的攝影作品，老豆冇野做就自發拎左袋垃圾去掉 (東京街頭冇乜垃圾桶，經常要keep住D垃圾一段長時間先有得掉)。後來阿媽發現袋垃圾仲係度，先知道原來老豆剛才拎錯左剛剛在超市買的手信當垃圾掉左，好在唔係買左好多錢，都係1000yen左右。
其時餐廳開始有生意，餐廳經理禮貌地請我們離開，而「鳩嗚組」亦已歸隊。「鳩嗚組」行左成日街好攰，冇心機再慢慢搵地方食飯; 兩老又因為掉錯手信事件而互相埋怨，心情甚差，冇心機搵地方食; 結果我們又回到Day 2幫襯過的日式西餐廳食最後一餐晚飯。其實難得一家人到東京，又係最後一晚，我都唔想同一家餐廳食兩次，又唔係特別好食，仲要唔係食日本菜。不過個個都冇mood，我呢個有職責無地位的導遊都冇計。
港燦自由行
食完飯，「鳩嗚組」帶兩老回到tokyu
hands超市買番頭先錯誤掉左既手信，再去藥妝店及「屋企」附近間超市繼續鳩嗚，作最後手信衝刺 ; 我就一個人到細妹口中好多野行的 Lumine
East 百貨公司嘗試鳩嗚。連日來擔任紅葉組組長，我都冇乜時間去鳩嗚。雖然個人不太好shopping，但最起碼都要買手信俾同事交差。不過我只有大概兩小時，所以唔係買左好多野，只係買左幾條300yen 頸錬。咁平，可能是made
in China的。行行吓，見到幾對操廣東話嘅人，有D仲拖住喼shopping。這令我想起早前有網民串香港人經常嫌大陸自由行鳩嗚阻街，其實係「五十步笑百步」。因為香港人自己去到日本咪又係一樣拖喼瘋買? 哈哈 ! 觀乎連日來我們一家在東京，時而控制不住聲浪在商店及車箱高聲說話，時而忘記了東京人坐扶手電梯是靠右企唔係靠左企而阻住左人; 時而因唔識路而在路口徘徊塞住條路; 時而忘記日本人要垃圾分類而把垃圾亂掉 ; 時而隨便在餐廳外的坐椅上坐下休息又冇幫襯，其實我們的行為在日本人眼中可能跟香港人睇大陸自由行無異。
9點半回到東京屋企，竟然只有細佬喺度。兩老同妹妹放低D野又出左去行超市同藥妝店未返。頭先兩老先話攰，做咩轉頭又走左去shopping?
最後一晚，大家忙於pack 行李，又忙於把兩老在下吉田買的過量生果吃掉。快樂的時間真係過得太快。一眨眼已經要離開這個為於新宿六丁目的東京屋企。 真係有D唔捨得。
「屋企」露台望出去
沒有留言:
張貼留言