會考放榜

屈指一算，原來會考放榜已經係七年前的事。

當年的我，在無驚無險亦無喜的情況下平穩過度，會考放榜帶俾我的回憶並不深刻。直到今年，才深切體會會考放榜是什麼一回事，因為今年係我細妹重讀中五後的會考放榜。

我呢個阿妹...唔算蠢, 唔算懶，不過，0係溫室中長大的她似乎未經過什麼風雨，略嫌欠了些鬥心。可能就係呢一點鬥心，令佢得到了最尷尬的分數 : 十三分。

佢最初知道分數時尚算冷靜，還帶點興奮的告訴我佢中文oral竟然有5*，(註:我識佢咁耐都唔知佢講野原來係有文有路的。舊年英文oral有A，今年就中文ORAL 5*)。直到佢知道學校收左一個同樣係13分但主科成績唔夠佢好的學生讀中六，且沒有考慮收佢，佢就覺得好委屈，在電話旁哭不成聲。之前仲口硬話唔使我地陪佢，依家終於忍不住開聲想我地去陪佢。於是我同阿媽就走去學校搵佢。

去到學校，我地搵左佢其中一個班主任了解情況。阿妹果D升到中六的同學包括那怕醜的男朋友仔也在她身邊。那位班主任似乎話唔到事，著我們去找另一位班主任鍾SIR。於是一岡人等浩浩蕩蕩出發去找鍾SIR。鍾SIR坦言學校的中六學位已所餘無幾，而且考獲13分的人有十幾個。不過如果有人DROP，我細妹將會係第一/二個選擇。其時我地已打定輸數，諗住耐心等到第四階段再出擊搵學校。我也在盤算星期五是否需調更幫細妹搵學校。

放榜日番到公司，我個腦一片空白，滿腦子都是搵中六學位的事，不時上網CHECK剩餘學位及查一查那些學位較多的學校校風如何。估唔到我要到自己放榜七年後先深切體會考生的徬徨。雖然好多人都話會考只係人生一個小階段，但我相信對很多會考生而言，會考就是一切。

經歷過愁雲慘霧的一天，今日阿妹終於收到學校電話話仲有一個位，可以俾佢升中六。我都唔知應該用"好彩" 定 "唔好彩" 來形容佢。

經此一役，希望可激發阿妹的鬥心。畢竟會考同高考，可謂小毛見大毛。真正的挑戰，中六才開始。