由於擔心復活節假期火車票比較緊張，加上想把握時間多走走，出發當日，我們六點幾就起床，未夠八點就來到了羅湖過關坐和諧號，九點半就來到廣州了。
到步後就先到青年旅社放下行李。正值EASTER，上次住的YHA都 FULL了。今次我們住的叫LAZY GAGA HOSTEL，中文名叫春田家家，據聞係香港人開的，難怪個名咁棧鬼。LAZY GAGA 其實比YHA還要好，COMMON AREA很大，只是每天我們都玩得好盡，早出晚歸，都冇時間在COMMON ROOM 好好HEA。
由於太早起身，加上天氣又熱又焗，沒上次那麼清涼，第一日在廣州總是不在狀態，冇乜心機。
我們從GOOGLE MAP看到HOSTEL「附近」有幾幢歷史建築，於是放下行李後就行去睇。點知廣州地大物博，我地又冇留意GOOGLE MAP的SCALE，一行就行左成個鐘，PASS左兩個地鐵站先來到
「附近」的這幾幢歷史建築 。
已經忘了這些在HOSTEL「附近」的古蹟是什麼。
由民國時代的歷史建築改建而成的青少年圖書館
睇完「附近」的幾個歷史建築後就出發到舊黃埔軍校去。舊黃埔軍校位於廣州的離島長洲島上。雖然船程只有幾分鐘，但渡輪原來係一個鐘得一班。我地事前沒有做功課，以為長洲渡輪好似香港的天星小輪咁頻密。一出地鐵站，就被一班自僱電單車司機包圍，叫我地坐佢架車去碼頭，仲話如果唔係就趕唔到船。半信半疑下包左架坐到兩個人的三輪車去碼頭，先知司機們為無坤我地，真係一個鐘一班船。我地一上船，船就開了。
前往長州島的渡輪
到了長洲島，先搵地方醫肚。網上D人話黃埔炒蛋好出名，其實只係好普通的一碟炒蛋，仲要賣成廿蚊，中伏了。
位於長洲島舊黃埔軍校附近的的孫中山先生故居。好多蚊。
食飽就到軍校參觀。這「舊軍校」仍未荒廢，仍然有學生來參加軍訓。以為黃埔軍校會係好簡樸的石屎建築，沒想到係由日式+中式大宅改建而成，古式古鄉兼有亭台樓閣。出乎意料。
軍校內的職員辦公室
見過的咁多孫中山先生雕像，呢個POSE 真係最有型有款
現在的舊校黃埔軍校仍開放給學生來柴娃娃軍訓。這是學生感言。
閱讀室
黃埔軍校最令人震撼的畫面應該就是個這家睡房了。
咁多人一間房夜晚的鼻鼾聲實在不敢想像。
參觀完黃埔軍校就打算到島上的列士牌坊去看看。遊客指南上的地圖顯示就在軍校附近。但我地搵極都唔見。問了當地人，先知道個牌坊好遠，要坐島上的巴士去。因為估計個牌坊都唔會太多野睇，加上天氣太熱太焗，決定放棄，早 D 坐船「番出城」。
廣州長洲島跟香港長洲島的民居倒有幾分相似
番到城，見時間尚未太晚，我們趕在5pm石室聖心大教堂關門前去看看。這間外觀比香港任何一間教堂都要宏偉的石室聖心大教堂隱身於尤如香港深水埗的市井鬧市之中，跟周遭的環境的確不太match。教堂內不淮影相，不過我個人覺得既然歐洲的大教堂都俾影相，點解廣州唔俾影 ? 扮日本人，聽唔明聽唔明。
參觀完大教堂後就搵地方找吃的。我的選擇困難症又發作，行左個幾鐘都唔知食乜。冇一間食肆想入。又想食廣州獨有的，又唔想食咁貴。旅伴Alice 又太遷就我，由得我亂行亂搵，，最後因為太攰而投降，是但入左個商場的餐廳食左一餐豪無地道特式可言的中餐。經此一役，我發現「行到邊食到邊」呢個STYLE唔太適合我。都係一早搵定食乜野好D。
搵食期間偶遇的一牌騎樓建築
第二日起身0係HOSTEL附近的餐廳食個好飽的中式早餐之後就去位於市郊的小洲村去。
小洲村是 so-called 嶺南水鄉，村落繞河而建，像蘇杭一帶的水鄉。只是我發覺我們來得太遲。這裡正被大力開發，村內有不少建屋及修路工程。本來村內有幾家頗有FEEL的CAFE小店。只是周圍都整緊路起緊屋，乜野風情都冇晒，連條河都冇乜水，生態被嚴重破壞。我們在村內的小橋休息時，旁邊坐了幾個納涼吃飯的老人。問老人來到小洲村睇乜野好，沒想到老人半開玩笑的說 :「睇乜 ? 咪睇個垃圾崗囉 !」無言以對。看來老人對自己的家鄉被這樣蹂躪都感到不是味兒。
小洲村的不少CAFE 小店慘被建築廢料包圍。無晒 FEEL。
來左廣州兩次，我個人都好似廣州 0左(i.e. 娘 0左)。
小洲村的蠔殼屋。現為CAFE
已經冇幾多水剩的嶺南水鄉「小洲村」。
在小州村的大會堂參觀時被一個少年纏住要做一個關於明信片的市場調查。見少年態度誠懇又好似冇人肯幫佢做，我地兩個就幫佢一把。填畢問卷，少年送了幾張他們公司的明信片答謝我們。一看，又是內地常見的那些印刷粗糙、顏色誇張得有點失實的風景明信片。想退回給少年，少年不肯收下。最後拿回HOSTEL放在COMMON ROOM讓有緣人拿去。
離開令人失望的小州村，我們向旅程的另一個HIGHLIGHT – 中山大學出發。
中山大學又是一間被譽為「內地最美麗大學」的學府 (其實大陸好多大學都有呢個衍頭)。相對我之前參觀過的北京大學及廈門大學，中山大學更西化，種滿老樹，建築更加中西合璧。校園的草地只能遠觀不能踐踏，有點無癮。
在中山大學閒遊了幾個小時之後經大學後門誤打誤撞之下來到了珠江岸邊，還有船到江的對岸沙面島。於是即興地坐了一會兒船過對面「遊珠江」，船費 $5，坐左15分鐘左右。一上船，很意外這隻「珠江天星小輪」裝修竟然華麗得似遊艇，有梳化椅之餘仲有冷氣。行左成日，終於可以好好坐低休息吓遊吓船河。到站都唔係好想落船。呢五蚊係抵俾的。
落船之後轉地鐵去老字號吳財記食雲吞麵。吳財記位置比較偏僻，0係條巷仔入面，但無損其人氣。
吳財記有兩個鋪位，一個要坐街
一個在對面一間舊屋內，入面仲有個小型展覽，擺放了造麵的工具。
我地點了雲吞撈麵同炸雲吞皮、油菜，一碗雲吞麵只係7蚊，不過可能要食兩碗先夠飽。麵不錯，只係，原來入面係冇蝦。之後再ORDER 個牛腩麵。可能因為冇蝦0既關係，我都係PREFER香港的雲吞麵多D。
食完雲吞麵再番上下九步行街到另一老字號南信牛奶甜品專家。點了芝麻糊，但感覺好一般。
食完糖水，我地向今日最後一個目的地出發 –太古匯的方所書店，雖然一D都唔順路，坐地鐵都有成七八個站。
想去方所係因為方所係我0係內地見過裝修最有型的書店，被譽為「華文界目前最新鮮、最具震撼力的書店」。書店運用大量木材及石頭設計，一入門口，就已經被收銀處後面的一大塊石牆吸引，RAW得來又相當型格。書店正中間是CAFE，令整間書店都充滿住咖啡香。只是面積不大，跟又一城的PAGE ONE差不多。遺憾是店內不能拍照。店內的職員客人人又好似比較有文化有修飬，搞到我都唔好意思拎相機出來像個遊客般偷拍。由於到達的時候已經8點幾，我只有一個小時行方所，淨係欣賞佢D裝修同精品都花左大部份時間，冇乜時間打書釘。雖然我對呢間方所十分欣賞，但並不睇好。畢竟太古匯呢個商場等同香港IFC咁高檔，租金一定好貴。單靠賣書似乎唔可能維到皮。下次再來廣州，方所都唔知仲健唔健在。
最後一天沒有計劃行程，想去的都已經去左。於是上午又再回到上次來廣州去過的沙面島及恩寧路拍照。雖然今次冇落雨，但天氣異常焗促，天色一片灰濛濛，實不是拍照的好時候。所以都冇乜癮。
在氣派古建築外DIY一個羽毛球場出來的同胞們。
到沙面島那間有點像赤柱美利樓的Starbucks歇一會
啖完咖啡回一回神之後，我們步行到我最喜愛的恩寧路看騎樓去。上次天雨關係，只看了大街。今回要看橫街窄巷，將這條據稱快將被改頭換面的舊街作個紀錄。
被兩棵夾住的一個騎樓
街坊飛髮鋪
午餐又來到了泮溪酒樓飲茶。
廣州想看的都已經看過。午餐以後我沒有其他地方想去，於是順應ALICE 的提議，去看看歌劇院和附近的小蠻腰、博物館等氣派新建築。
多麼糟糕的空氣。當天的空氣污染指數應該極高，一片迷霧。復活節廣州之旅就此結束。
沒有留言:
張貼留言