霜追人@大帽山 ，在59年內最凍的一天

59年來香港最凍的一天，我們剛好在香港最凍的大帽山 (-6度) 賞霜和被霜追。不過尋日有大量賞霜人士被困大帽山令消防員疲於奔命，我都唔好意思將賞霜的相放上FB呃like，就放在這裡作紀錄。

睇到有報導指香港24／1有機會落雪，又難得有人同我癲，決定上大帽山一趟。其實去旅行都見過結霜同落雪，但未喺香港見過。未來香港可能冇冬天了。

經過我們的領隊郭導的分析，從川龍沿山路出發上山有較大機會睇到霜，亦較走車路安全。於是星期日一早在荃灣出發坐小巴往川龍起步。

早上天氣又凍又落雨，平時呢種天氣根本唔會行山，但為左睇霜，大家都沒有打退堂鼓。

天文台一直都話星期日最低都有幾度。之前仲驚上到山都中午會冇霜睇，點知原來大帽山凍到零下六度。坐小巴來到只有三百米高的川龍，都仲未開始上山，已見不少車結了冰，而且雨夾雜冰粒，打落塊面會痛，又非常大風，好惡劣，根本唔可能擔遮。連拎相機出來影相都驚會整爛部相機。好在大家都準備充足，有強勁風褸。我果件買左成十年的 Goretex風褸發揮到佢嘅作用，令我喺咁惡劣嘅環境下都冇濕身凍病，免於受「風吹冰打」。上山不久，大家的風褸，褸帽，背囊 rain  cover都結左層霜，非常誇張。雖然去旅行時都試過零下行山，但行到個人結霜真係未試過，仲要竟然係喺香港發生，睇霜之餘自己又結霜，真係霜追人。

第一張拎出相機拍的照片。其實當時天氣仲係好惡劣，仲落緊「小冰丸」，只係棵樹結晒霜，冒住凍彊隻手嘅危險都要影左先講。

只係剛剛行開始冇耐，背包就結了霜

外套同帽都結了霜

頭頂的一層薄冰

從山上走落來、全身結霜的一名哥仔

隨著高度的提升，結霜的植物也愈來愈多，景色也愈來愈壯觀。雖然仍然不斷落雨，但山路的植物檔風，冇頭先喺川龍咁難頂。此時開始看見落山的山友，其中兩個昨夜在山上過夜的男生最誇張，成身都被冰封，可想而知山上有幾凍。有山友提醒我地山上的馬路結了冰，行唔到，要原路折返。我地也作了隨時沿路折返的準備，行得幾高得幾高。

地上拾到了樹頁形狀的冰塊

被冰包住的葉

這些芒草其實都被冰封

又凍又大風。面部肌肉都凍到麻痺，講野似中風。

我們身後是一片結了霜的芒草。影完張相，隻手都凍彊。

風大，山下的景色很清，甚至見到香港島。

著剛落山的山友幫忙拍一張合照

石頭結霜

望向山頂，草都結了霜

石頭表面又結了霜

冰封的樹枝。塊面都吹到紅晒。

像被玻璃包住的樹頁

白色草地

行至接近林錦公路，有山友提醒前面馬路已被封，不過山路的景色比山上更靚，呵使失望。愈過結了碎冰的山路來到林錦公路，果然見馬路結了冰，已經不能再走了。此時見三個消防員跣住行咁帶一對男女行過來，並跟我們說前面不遠處的大閘已被封，不可以再上山。既然消防員都行到爭D跣低，我們都決定不再前進，原路折返算了。

冰封的石屎路。賞霜之行就在此收倌。

滿佈碎冰的山路

回程前再望多眼最宏偉的霜景

下午回程時，山路比上午冷清多了。落山回到荃灣才知大帽山很多人被困，消防員呼籲市民不要再上山，難怪我們一直聽到消防車聲和看到飛行服務隊的直昇機。全靠領隊郭導的英明領導，我們一行四人才可以安全地用自己的方式上落大帽山賞霜，不用勞煩消防員來救我們。

新的一天，天氣好得出奇。昨日在大帽山的情景好似發左一場夢。