原來我已經三年冇試過一個人去過旅行。台北語言通交通便利食野又冇問題，遊台北應該是低難度，是適合一個女生去旅行的好地方。雖然大城市從來不是我旅行的首選，但我喜歡一個人安全地冒險。對於這次一個人的小旅行還是有點期待和興奮。
去年去伊朗前在大陸Amazon網站買簡體版伊朗 Lonely Planet時做promote，買兩本指定的簡體版Lonely Planet只需100蚊人仔，於是搭單買多本台灣 Lonely Planet傍身，估唔到咁快就有用。簡體版台灣Lonely Planet印刷是我用過最精美的，全彩色印刷，但關於台灣歷史、文化等內容全被抽走。我都係去到台灣先發現。又喺大學圖書館借左舒國治本<台本小吃扎記>，期望去台北食好西。
驚險的「員工家屬優惠票」
1月30日星期六天未光就起身，因為要坐上午9點的班機。七點未到就來到機場，counter 職員說暫時班機full左，只能先幫我報到，要我8:15再回來睇睇有冇機位，於是去左機場麥當勞食早餐。太早，唔係好哽得落。8:10又番去counter，佢話班機delay，叫我十點三再番去。雖然暫時有位但唔可以幫我check-in住。在機場百無聊賴的我此時才有機會靜下來認真睇吓本Lonely
Planet 計劃吓我個台北之旅。等到十點十分再去counter，今次可以check-in了。但登機時間竟然係10:20分，仲要去無厘公咁遠既新閘口218。Check完in 都十點三，得5分鐘點去呀?
拿拿臨仆去禁區過關。上次去機場張身份証過唔到e道，好彩今日順利過到。之後跑落無人架駛列車站。218閘好遠，要坐兩次無人架駛列車。落左車，唔知點解有人派水派三文治 (睇報紙先知因為新開的218閘口冇食肆，機管局派人在閘口派糧水。)。時間緊迫，我只係拎左枝水就繼續跑。雖然係咁跑，但來到218都用左15分鐘。來到後見大家都淡淡定坐喺度，即係仲未登機。既然未登機做乜叫我10:20登機呀??
搵個位坐低抖順條氣，似乎班機繼續 delay。買「員工家屬優惠票」真係太刺激。買左之後又驚上唔到機，check-in之後又時間緊迫仆去登機，老人家同心臟病患者不宜購買。
上到機都11點幾，架機又等到12點先飛。我的座位在平時要加錢買的經濟艙第一行，最闊絡。可能因為要加錢冇乜人買，所以益左我呢D買「員工家屬優惠票」的人執死雞。不過我真係冇乜點坐過身一行。D電視、餐桌都唔知點樣拉出來。食飛機餐果陣 (得個腸仔飽)想拉餐桌出來，結果拉左個電視，要勞煩鄰座那位VIP台灣男幫助我搵番張餐桌;
想開燈睇書，又按錯了call 空姐個掣，簡直係大鄉理出城。一個人外遊有時的確係比較白痴。
1:30落機，沒料到台北機場咁多人，目測等過關的人有幾百個，排隊過關都排左成個鐘。過關後去ATM拎台幣、排隊買電話卡，上到前往市中心的國光客運都已經成三點。匆匆在台北火車站食碗麵作遲來的午餐，轉地鐵去位於龍山寺的hostel。一出地鐵站，竟然是十字路口，八個方向，睇極地圖都搞唔清應該行邊便要問人。去到hostel樓下按門鈴，又按錯左隔鄰店個門鈴驚動左個店員。真係唔好意思。
在hostel check-in加settle down之後，再出去都已經四點幾，天都就黑。本來以為坐九點幾機去台北時間會好好用，冇諗到要四點幾先出到去玩。出去果陣又有D肚餓，去seven買個菜肉飽食，點知入面係冰嘅唔敢食。台北之旅，有一個不太好的開始。
既然天就黑，我決定先去故宮博物院。夜晚去應該冇咁多人。一出劍潭捷運站就已經見到清淅嘅指示教人去邊度轉巴士; 落巴士果陣，司機又會主動同乘客講點樣行去博物院。台北的交通系統都幾體貼。
故宮博物院
入到博物院，雖然已經入黑，但人流不少，而且仍然有大陸旅行團。博物館只有週五週六先會開夜晚。連夜晚都咁人齊，日頭應該會超多人。為左分散人流，外國人四點半後入場可以買優惠票NTD150。入場前要放低水樽，因為唔俾飲食同影相。
北京的故宮我到過兩次。每次去都覺得入面好似好空洞冇乜野睇。依家先知道原內入面D瑰寶俾蔣介石搬晒去台灣。台北故宮博物院的藏品絕對絕對比我在內地到過的任何一個博物館都要吸睛、厲害，總之係勁。儘管我是一個古董文物的門外漢，一樣睇到目瞪口呆。某D展館更加係睇完又睇。我覺得去台北一定要去埋故宮博物院。後來在hostel跟兩個內地來的遊客聊起故宮博物院，大家都讚嘆故宮博物院很厲害，感受很深。而且博物院對擺放展品的佈置、燈光等都很花心思。有點遺憾的是故宮博物院的鎮院之寶玉白菜已搬到剛落成的位於嘉義的故宮博物院南館，無緣看到。但正因為新開了個南院，博物院的紀念品店全線貨品打折。結果我單是花在紀念品店的時間也差不多一小時。很多紀念品都想買，只是價錢不便宜。最後買了最暢銷的「朕知道了」膠卷、「朕閱」磁石書簽和用金色印上散氏盤拓銘文的帆布袋。
台北的巴士司機
八點幾鳩嗚完後搵巴士返捷運站，見到五十米外有巴士正準備離開，但架巴士走了幾步又好似想停低。走過去看看，司機叫我快上車，原來佢真係想等埋我。巴士已經好FULL，我只能企車頭。巴士去到士林捷運站，司機提醒要去夜市的不要下車，還未到站。就係因為司機提一提，我就決定去士林夜士。在捷運站落車的人很多，有些乘客沒有悠悠卡要跟司機換零錢，結果令排在後面的乘客鼓譟，嚷著要下車。可是司機也沒有動氣，向後面的乘客說 : 「別急，一個一個來，我一定會等你們的哦 !!」，然後向每一個落車的乘客說謝謝，有些乘客也跟他說謝謝司機。這讓我想起早前在網上流行的一段沙田綠VAN禮貌司機的片段。禮貌司機似乎在台灣好正常。但在香港卻是一宗新聞。
繼續開車，司機跟一個同樣來自沒有禮貌的國度 –大陸的一家三口聊了起來，我又八卦走去聽聽。司機已經62歲，以前是貨車司機，得了五十肩就退休，但退休後又很無聊，於是當了巴士司機，之後連五十肩都沒有了。他說他把巴士司機的工作當是玩，一直都覺得這個工作很好玩。任何工作只要當是玩就不會辛苦了。我發現車頭貼著的巴士司機照片和資料是個年輕人，便問司機相片中的人是他嗎 ? 司機忽然小聲的說那個人不是他。那個年青人覺得累就找他來替工。難度司機是無牌司機
??
司機在士林夜士的巴士站提醒要逛夜士的人下車，並告訴大家捷運站的方向。就在下車的地方我看到了對面的名店十全排骨，於是就入去食排骨湯+飯作晚餐。香港這類小店的服務通常都很差，服務員通常都黑口黑面，粗粗魯魯。不過在台灣，似乎服務再差也不會差過香港。餐廳的生意不錯，但很髒，有蟑螂，味道也一般。食完走出餐廳，先知原來真正的十全排骨在隔離，唔係我食果間。有時一個人去旅行真係因為太求其而搞錯。
冒牌十全排骨
食完排骨其實未係好夠飽，又深入夜市搵吃的。雞排、雞翼包飯等都好吸引，不過我得一個人又已經半飽，實在食唔落。行行吓見到另一名店 - 士林伯豆花，就決定食豆花，統一價NTD25跟兩樣配料，選了地瓜和紅豆。地瓜有薑汁啱我口味，不過份量實在太多，食唔到一半已經食唔落。
士林伯豆花
人不算多的士林夜士
士林夜士外的福德宮
食完豆花想買D生果類的東西，但D豆花已經搞到我一肚水，唔想飲果汁。行行吓有少女派小杯的蔓越莓汁試喝，儘管不知什麼是蔓越莓還是試了，味道有點怪，不太喜歡。可少女似乎對自己的產品很有信心，問我買不買，我說不要了，她便一手踏著我的膊頭說 :「你不要試喝完就走哦」，不知是「兇」我還是求我，我沒有理會她就走人。那杯蔓越莓汁雖然不對胃口，但已滿足了我對生果類東西的慾望，於是決定回hostel。
回到hostel已經快11點了。星期六的晚上hostel生意不錯，我住的八人房都爆滿。同房是一班本地女生，比我還要歸。見有人睡覺，雖然小聲說話，但竟然深夜在房內吹頭，瞓唔到覺。
這次在台北入住的hostel叫Kali Inn，步行往龍山寺捷運站5-10分鐘，女生多人間一晚費不用港幣100元，包早餐 (但我冇食，因為附近有很多食肆)。房內有locker + 床頭燈 +衣架+wifi，仲有小露台晾衣服，有風筒任用，切合backpacker一切所需，住得過。我比較喜歡這些規模較小的hostel。
Kali Inn的八人女生房
Kali Inn的 Common Room
沒有留言:
張貼留言