背山面水的Nomand on Murray Backpackers.
第一餐自己煮就出事
HOSTEL 每日都有兩班車出 TOWN 俾我地買野，每次停半小時。澳洲物價昂貴，我地又冇咩錢，所以買ｄ乜都要 ”諗過度過”，半個鐘又點夠我地用？於是差不多每次我同 TAK 都要跑番上車，仲要係最後兩個上車。唔識煮飯既我飲食選擇更少，第一晚我嘗試整叮即食PIZZA ，不過唔知叮幾耐，因為我未用過微波爐。一個鬼阿叔見我一臉疑惑，主動幫我研究，建議我叮廿分鐘，結果叮到五六分鐘個ｐｉｚｚａ著左火，大驚。好彩同房的韓女 YUMI 幫我拎番個 PIZZA 來，又叫另一韓男SUNG 幫我”散”碟，頓時覺得韓國人好好人呀！
我同Tak 住八人房，四個韓國人兩個日本人。而 backpackers 內亦以亞洲人居多，鬼只佔極少數。日韓男仔打扮極隨意，頭髮好多都明顯好耐冇剪，令人失望。睇得下的沒有幾個。不過，這並不等於愛情便不會發生。一個叫 Andy０既韓男就不斷追求同房的日女； 一個 Irish 男又同我同房的韓女調情； 一個意大利佬又同左個唔點識英文０既日女拍拖，本來我都唔睇好佢地，點知十個月後我０係西澳旅遊時竟發現佢地仲一齊，真奇妙。
@ Olive Oil Packing Shed
我地０係澳洲０既第一份工作係 Olive Oil Packing，七點開工，六黠半要離開 hostel。個 farm得我同Tak 兩個backpackers，個 shed 得一條生產線，成條 line 既工人唔夠５個。開始時阿頭叫我企０係生產線０既開首不斷將空０既樽放入生產線，當ｄ樽傳到 Tak 果度時已入好油，每六個咁傳到 Tak 面前。Tak的工作就係將一張瓦楞紙放在各樽之間以分隔及保護ｄ樽，好讓下一手 pack箱。０係室內工作不用日曬雨淋，其實不錯。不過要不段放樽上生產線０既我膊頭同手臂都好快就倦。我手又細，一次最多只可放４個樽。個阿頭唔知係咪嫌我慢，周不時走來幫我手搬，仲可以一手搬六至八個，看得我目瞪口呆，也不敢怠慢。放 break 後阿頭叫我同Tak 換位，好讓我的膊頭休息。Tak 的工作係比較輕鬆，不過我唔熟手，做得唔快。
工作至下午三四點，生產線停產，我同 Tak 幫手清潔，仲要清得好徹底，心感不妙。我地都唔想咁快冇左份 indoor 工作。放工番 hostel 睇job board，果然我地第二日０既工作唔同左。hostel manager話我地會做 potato sorting，very easy。
On Potato Harvest Car
第二日Warrick 車我地去到一塊 ”一望無際” 既泥地等開工。如果唔係塊空地前有對門同牌，都唔會知道塊地係一個 farm 。我同 tak 兩個０係風涼水冷既門口等左幾個字終於有人接，係一個幾 nice０既阿叔，不段潦我地講野。阿叔車我地去 farm 中心同其他本地工人會合。由於架harvest car 未ready，我地一班人０係個 farm 要等成個鐘。不過阿叔卻自得其樂，０係車尾拎左個 golf 棍出來打golf ，個波打遠左，仲揸車去接。又０係唔知邊度搵到條蛇皮，仲叫我同 Tak帶番 hostel 整古其他人。
harvert car終於來了，還帶來了流動廁所。我地同阿叔及一個本地女工人Sandra 上車尾箱 standby。當架車０係個 farm 度行，ｄ薯仔就會不斷被掘上車，送到車尾箱。我地四個就要撿走隨薯仔被掘上來０既廢物如石頭、樹枝。開頭覺得份工幾過癮，好似玩緊歡樂天地ｄ遊戲。但同車的 Sandra姐勁認真，手腳勁快，已達忘我境界，企佢隔離０既 Tak 經常被佢檢出的大型廢物打到。我有幾次分心，睇唔到一ｄ廢物，佢竟然熄左輸送機大大聲叫 ROCK!! 示意我檢走石頭。
收工時阿叔同我地講未知聽日會否有工開。放工睇 job board，果然day off，才第三日就冇野做。。
沒有留言:
張貼留言