澳洲闖蕩之旅(廿三) - 柏斯行

EASY RIDER TOUR在perth 完結，所有團友都入住了導遊介紹的big world hostel。我嫌貴，獨個兒到已一早預訂的cheviot lodge入住。

導遊在市中心放下我，我背著行李一邊看地圖一邊搵路。原來這平價hostel離市中心有廿十分鐘路程，我又走錯路，用左成半個鐘先搵到。


應門的是一個有點不修邊幅、頭髮明顯長期沒有修剪的華人。他用英文問我" are u check in? "，我當時很累，沒多思考便用廣東話回答　”係”。對方也識趣地用廣東話笑問　”係呀？”原來佢係香港人Auch，來左澳洲６個月，依家一邊０係perth市郊的餐廳做雜工，一邊０係hostel做 reception for free accomdation。當日仲係佢第一日做reception。

cheviot lodge係我０係澳洲住過最平的hostel，一星期$75，一晚12蚊，仲有早餐，設施都不錯，係廚房比較惡劣。入到房，再發現多兩個香港女孩阿津同JACKIE，JACKIE本身做保險，買左環球機票去旅行，來澳才5個月便決定離開。較健談的阿津來澳四個月，之前0係sydney warehouse打工，人工 8 蚊一個鐘，仲要成日俾個失婚香港老板娘鬧。其後經其他香港人介紹到victoria打農場工。我來perth之前只遇到davy一個香港人，想不到在perth 的hostel一見就見3個。

跟阿津一起到廚房晚飯，期間AUCH也來吹水。原來AUCH同阿津之前在同一班香港人的介紹下到同一個農場打工，做摘提子同PACK提子。AUCH一講起果班一起工作的香港人就當爆晒粗。果班香港人係一對兄妹同一個女仔，在香港從事一D比較低下階層的工作，似乎一心來澳洲搵錢，唔係來旅遊。當時AUCH在農場負責摘提子，其他香港人做PACK提子，人工是件計的。聽阿津講，班香港人嫌AUCH摘得唔好，累佢地PACK得慢，賺唔到錢，於是對佢單單打打迫走佢。估唔到呢D事會發生0係BACKPACERS身上，仲要係同聲同氣的香港人。大家放低香港的工作來到澳洲，無非都係想體驗一D簡單獨立0既生活，做D 0係香港唔會做0既野。0係人地地方搞是搞非，為的只是一份牛工，實在影衰香港BACKPACKERS。

飯後回房寫日記，auch搵我一齊出common room 睇世界盃英格蘭對厄瓜多爾。本來easy rider的團友也相約一起落pub睇波，不過我一早已決定唔去，因為同佢地唔係好岩玩。場波其實好悶，成場得一個入球，不過我同auch 掛住吹水，都冇乜點睇過。此人異常健談，場波踢左幾耐，我地就吹左咁耐。一個人旅行左兩個月，好耐冇試過用廣東話吹水吹得咁開心了。

我身旁的傻仔就是auch。

第二朝一早起床吃free breakfast，都係見慣的多士/con flake/Coffee/tea，但竟然有朱古力津子醬!!我不客氣地吃了四塊多士。之後向來自北京的老闆娘打聽怎樣出city，auch 咁0岩經過，話可以帶我周圍去。本來我有d猶豫，因為我在perth只留一兩日，想把握時間獨個兒發掘這城市。不過auch只帶我玩一個上午，下午佢都要開工，所以答應了。

出到city，第一件事是找西澳西南部的旅遊資料。auch建議我參加幾個平平地的day tour。不過聽說西南部十分美麗，加上這將會是我在澳洲旅程遊覽的最後一個地方，我不想太頹。時值當地旅遊淡季，選擇不多，於是參加了那最貴的south west五天 tour，想去的地方都包了。

之後我搞肚，auch帶我到一商場搵廁所。談起打農場工的經驗，原來佢剛從農場回到城市跟我一樣有cultural shock，覺得自己係鄉下仔，跟城市格格不入。這種經驗要在澳洲打過農場工的backpacker先感受得到。

參觀了西澳博物館，可觀性頗高，有不少關於澳洲土著的展品。之後逛美術館，逛了不用五分鐘便離開。領回寄存的背包時也覺得不好意思。

土著洋娃娃




London Court










Perth的地標　－　Bell Tower

下午跟auch步行回hostel食飯。邊走邊談到大學時的趣事。原來auch是轟動一時的中大四院互片事件的搞手之一，其背脊更上了電視。Auch又講起讀書時的出猫技倆。他修的其中一科考試可以帶一張猫紙入試場，於是有的同學會將notes用power point一開６４的方法印在一張紙上，如果咁都唔夠，仲可以整埋活頁，可以揭。真的意想不到‧

我們又談起香港的美食。想起港式奶茶、燒味、點心等香港獨有的美食，本來已肚餓得很的我更加肚餓，快走不動‧在香港，我可不會因為想念食物而腳軟。

很喜歡auch為日本人和韓國人改的代號：「紫菜」和「泡菜」。

吃過午餐，我獨自回到市中心閒逛，並登上免費的blue cat 巴士到king park睇日落。

柏斯的夜景其實不俗，不過還是不及香港吸引。

離開king park　獨自回hostel，貪得意沒有步行坐了火車，怎知火車到站時找不到打開車門的按鈕，眼白白望著火車站遠去，甚無奈。此時天已黑，坐回頭車回火車站以後又走錯路，幸好遇上一個好心途人及好心司機教路才平安回hostel。

第二天坐火車到perth 附近的 fremantle



perth的天氣是出名好的。不過經過三十分鐘車程，已見窗外橫風橫雨..

Frementle的火車站




Frementle本身是一個很精緻、很有歐陸情懷的小城。可惜突而其來的大雨破壞了一切，那些很有feel的室外cafe都搬到室內，好無癒....

為了避雨，在一唱片店逗留了好一陣子，並買了一隻澳洲本土country music歌手slim dusty的唱片。kimberley tour時導遊經常播slim dusty的。本來對這些老土音樂有點抗拒，這刻卻覺得slim dusty的音樂很地道，很澳洲。




坐免費巴士到Frementle的museum，出現了一陣子陽光







登上另一景點round house拍照，天色又再昏暗。到麥記食雪糕兼避雨，3:30便坐火車番perth，結束這失敗的Frementle之旅。因為大雨，我真的丁點歐陸情懷都感覺不到。相信我對frementle的記憶不久會消失。

回到perth，驚覺雨後的黃昏十分美麗。










回到hostel，想收回前一天晾的衣服，卻發現衣服不見了。老闆娘的女兒說沒有收起衣服，並問會唔會俾d咸濕佬拎左。結果在旅程臨終結時我失去了跟我闖盪江湖的lufuma行山褲和一些內衣褲。

回房間跟兩香港女孩吹水。jackie第二天便回香港了。我問她回港後第一件事會做什麼，她想了一會，冷靜的說 : "要換智能身份証"，除後又說"應該剪左頭髮先去影身份証"。阿津又告訴我她小時跟家人做小販走鬼和民安隊的趣事，言談間經常搞亂了食環處的全名，將 "食物環境衛生事務處"說成"環境衛生食物事務處" 又或者 "衛生環境食物事務處"，聽得我也跟她一起搞錯了。

在PERTH的最後一晚跟同房的兩個香港女孩jackie及阿津合照。

回港後常聽一些香港backpackers說不太喜歡旅程中碰到香港人，但我每碰到一個都很高興。我在澳洲一整年只碰過davy、auch、阿津、jackie四個香港backpackers，每個都很有趣，每個我都想再見面。

在柏斯這個跟香港沒有時差的城市碰上幾個香港人，讓我覺得自己跟香港很接近。