自由行試過好多次，帶埋屋企人扶老攜幼自由行今次都係第一次。我人生第一次自由行係2005年1月由九龍坐火車去北京。而第一次同屋企人自由行都係去北京。不過我屋企人當然唔會同我坐火車啦! 要坐飛機。
這個 family 北京自由行之旅，我身兼企劃 (本來叫左我細妹做。不過.....)、翻譯、導遊、交通督導、搵路使者、攝影師。要揍住好奇心重如細路 / 乜都想知乜都想食但又唔識講國語0既老豆、有「太后病」(即「公主病」進化版) 兼一樣唔識講國語0既阿媽、帶左個人來但冇帶個腦來的細妹，其挑戰性絕不亞於去南美州。
左上 : 坐十點幾機，一早六點幾就起身，大家都好眼瞓。
右上: 坐機場的接駁巴士準備上機，突然下起大雨，即時有地勤人員派方便雨衣。香港機場的服務真體貼!!
左下: 終於來到北京機場三號客運大樓。過關時傻更更唔知排邊條隊，關員可能聽到我地講廣東詰，對我們說港澳同胞可以用 e 道。哦! 原來北京都可以用e道，犀利呀! 過關後，我地坐左差不多十分鐘無人駕駛列車先可以拎行李同出閘，仲遠過由上水去太和。北京機場使唔使咁大呀???
出機場，登上往酒店的的士，即遇上到國內大城市旅行都會遇到的問題 - 塞車。窗外盡是那些遍佈全國、一式一樣、多快好省的無特色水泥建築。屋企人對車窗外的北京的第一印象是 : 點解咁似深圳 0既 ? / 一d 都唔覺得自己來左北京。
本來四個人，坐的士不用煩，亦不貴。只是北京的士超難截。我們多次被莫名其妙的拒載，而且塞車嚴重，所要好多時要坐地鐵。北京的地鐵有13條線，由A點去B 點，可能動輒要轉幾次線。我們到埗後由酒店坐地鐵去鳥巢，轉了3次線，花了接近一小時。 轉線當然不會像香港的方便，走過對面月台便可以。而是經常要在人多擠迫、無冷氣無扶手電梯的走道走上走落。最煩係次次入閘都要安檢，十分擾民。沒去過旅行，不會知道香港的港鐵其實很好。
帶著家人坐地鐵，由於家人太信任我的關係，大家都旨意晒我，無帶個腦上車，總是搞不清哪個站要下車、哪個站要轉線。例如我說了十二萬次去機場要到東直門站坐輕軌，還是會有人問我:「我地去邊度轉車呀? 西直門 ?」既激氣又好笑。
山長水遠入鳥巢、水立方。其實都 ok 無聊。
離開鳥巢，到王府井小吃街及東華門夜市吃小吃當晚餐。當年我也在這裡吃了幾頓。只是七年後的今天，這裡雖然懶文明，名碼實價，但食物很貴，價錢跟香港相約。當年我買的幾塊錢雲南米線已經絕跡，換來的是檔檔一樣的串燒、爆肚之類，可觀性甚低。記得當年我地貪得意，吃了蠶蟲串燒，才幾塊錢。 依家賣到廿幾蚊一串，食唔過。除了貴，我們買的一碟炒麵仲係臭的，食一啖就倒左。多令人失望的東華門夜市哦!
第二天又得早起床。我們要去長城做好漢!!
自由行去長城，當然不會去旅行團必選的八達嶺。我上次去司馬台長城，但路比較爛，不適合一家大細去。於是選了開發程度較好，但位置較偏遠、遊客較少的慕田裕長城。
從北京市中心前往慕田裕長城需要坐公交車，16蚊一程。但公交車只有三月至十一月先有，而且一日得兩班，班車仲有成十幾廿個站，站站停，一坐就兩三個鐘。如果冇位坐要企住去都會好辛苦。不過，慕田裕長城的確幾壯觀。甚至比我之前去的司馬台更上鏡。而且遊客多是老外，幾乎看不到一個內地旅行團，去得過。
右上 : 我們的早餐兼午餐 - 慕田裕長城外的 subway。慕田裕果然是打老外主意的，竟然沒有中餐廳，但有 subway。我爸我媽迫於無奈吃了人生第一個 subway 三文治。但我覺得在長城食 subway 都唔錯。因為方便攜帶，食唔晒可以帶上山一路行一路食。
下圖: 坐纜車上長城，60蚊單程，好貴。後來才知道走山路也不難，應不用一小時。不過坐纜車的好處是可以在14號峰火台作起點，8號峰火台作終點，路程絕大部份是下坡路，輕鬆易行; 如果坐滑道或行路上山，路程則變成了上坡路，辛苦 N 倍，可能行到連影相0既興致都冇晒。
左下 : 我地一邊行，一邊影，進度非常緩慢。
右下 : 由於要向冰淇淋小販打聽落山的路，老豆買左條「老北京」牛奶冰條。話明「老北京」，味道當然比較北京，唔係好 0岩 香港人啦。食完仲話有d 搞肚，要搵廁所。
落山只花了大約半小時。我們落山時還遇到不少相信是自駕遊的本地人扶老攜幼步行上山，還帶了野餐用品來邊行邊休息邊吃東西。下次有機會再來就走上來算了。回程，又是兩個多小時的公交車。我們提前半小時到巴士站排隊才不用企回去。
去長城熬了大半天車，晚餐要吃好的。本來想去東來順吃涮羊肉，但東來順可能生意太火的關係，冷氣都好似唔開，熱得像焗爐，令人受不了。 結果去了附近的全聚德吃北京填鴨，裝修金碧輝煌，有點像香港的珍寶海鮮坊，鴨的味道是不錯，但不是太特別。回想05年我第一次來北京，因為嫌全聚德貴，在另一家叫「便宜坊」的食肆吃填鴨。旅伴嫌太肥膩，大半碟鴨都被我吃掉，結果當晚開始又痾又嘔，食乜嘔乜，無晒食慾，並持續了好幾天。那是我多次旅行中最慘痛的飲食經歷。去南美洲都未試過痾嘔得咁嚴重。
全聚德@王府井
王府井大街遊過長城，吃過烤鴨，大家心情都好，咁就順便夜遊天安門，讓大家真的感到自己來了北京吧!!
夜遊天安門。七年前的一個夜晚我自己一個人從當時的旅館步行了半小時到天安門去。當時是冬天，天安門外很冷清。這天來夜遊天安門的人比上次多很多。來到天安門，爸媽勾起了兒時在大陸生活時對北京的嚮往和崇敬。對當時的他們來說，北京天安門是既遙遠又神聖的地方，不敢奢望有一天可以來看。 N 年後的今天，他們的乖女終於把不諳國語的他們帶來了天安門前。係咪好孝順先?
第三天，我們要搬到四合院去。
臨搬酒店前，老豆話點都要去酒店對面的北京火車站看看。搭正十點，火車站鐘樓響起了慢了半拍、音色有點粗糙、節奏有點哀傷的<東方紅>旋律。阿媽話聽過那段鐘聲覺得自己真的來到北京了。
搬到四合院安頓後，我們打的到頤和園去。頤和園面積很大，但大家興趣不大。
離開頤和園，我們到鄰近的北京大學去。北京大學也是很大。當年我來的時候是冬天，湖都結冰了。
右下 : 老豆又搞肚。我們在 canteen 等他解決。累壞的妹妹等到瞓著。
我們住的四合院。由於職員搞錯，家庭房俾人住左，我地要住二人大床房，老豆要打地鋪。只見佢瞓在地上依然悠然自得，唔知仲以為佢好舒服。
Day 4 星期日，到潘家園尋寶去，卻下起了大雨，不少廉價地攤都收檔了，冇收穫‧不過爸媽還是發現了不少他們小時候看過的漫畫和小玩意，總算有點得著。
擾攘一輪後，好不容易我們在潘家園截到了的士到後海去，為的是要讓妹妹到烟袋斜街去買手信。
烟袋斜街，我爸我媽行完都係記唔起條街名。
等了又等篇....
左上 : 我們在等阿媽及細妹 @ 後海，唔知佢地搵咩
右上 : 老豆在等阿媽及細妹 @ 頤和園，唔知佢地搵咩
左下 : 老豆在等阿媽及細妹 @ 烟袋斜街，買野
右下 : 終於輪到阿媽及細妹等我地 @ 故宮，寄存行李
在北京的最後一個晚上發生了亂事 。
話說我們住的四合院供水系統較弱。某人屙完屎，無為意d 廁紙唔可以扔進馬桶，結果整塞左間房個廁所，點沖水都沖唔去佢 d 屎。
事發後，罪魁禍首若無其事，亦沒有搞番惦個廁所的意慾。只是惡臭難忍，擾攘一輪後，我同老豆問四合院職員借左個泵，由老豆出馬將廁所內的亂事「平定」。史稱「 xxx 屙屎之亂」。
左圖: 老豆用泵將亂事「平定」。
中圖、右圖: 當老豆一臉無奈地帶借來的泵進房時，旋即引起一陣爆笑。包括罪魁禍首。
最後一天，離開四合院後，我們帶上所以行李到天安門廣場去‧
跟七年前的北京不同，現在的北京，處處要安檢，十分擾民。其中天安門廣場的安檢最為認真。我爸的大背包行李多，加上樣貌形跡可疑，當然易出事。本來要打開背包俾保安慢慢睇。不過後來保安知道我和細妹跟老豆是一家人，唔似壞人，決定放人。
背著行李逛天安門廣場。同志們辛苦了 !!! 
本來打算先到「老毛紀念堂」看毛澤東再到故宮。只是紀念堂的人龍很長。排大隊去看一條「咸魚」好似唔係好值，於是決定放棄，直接去故宮。
故宮勁大，背著行李逛故宮不是辦法。聽說故宮有存包的地方。可是我在入口處找了很久都找不到。問了幾個態度愛理不理的工作人員後，我才終於知道了那個位置既偏僻又隱藏、指示極不清浙勁廢的存包處，在午門的一個角落。其實故宮的寄存服務挺好的，可以幫客人將行李送到出口去，好讓參加者不用走回頭路，而且免費。可是存包處真的難找。我就見到有個鬼妹背住個相信有 60 L 以上的大背包在故宮坐著發呆，相信是語言不通，找不到存包處而累透了’
無袋一身輕。可以輕鬆行。
故宮太大，體力消耗得快，好快 D 早餐就消化晒，要坐低補給。現在的故宮多了很多供人休息的坐椅。七年前我跟 Emily 來的時候行到腳跛都搵唔到地方坐。行到快虛脫才找到個室內的休息站。
又係佢。張張相都係佢。
這次來故宮多了幾個室內的文物展，是七年前沒有的。只是今次再來故宮狀態不佳，有 d 作病，加上帶來家人，無時間也無心機一一細看。有機會想自己一個再來慢慢睇，慢慢影。
行左幾個鐘，又要補給。
下午一點半，要離開故宮準備到機場去。但找不到取包的地方。不肯定在出口外還是內。由於搵唔到取包處，想出大門搵。當我半隻腳已經踏出大門時，心裡有把聲音提我最好搵多次。因為如果出左門口先發覺取包處0係入面就麻煩了。 於是在搵一次，終於讓我找到了這個他媽的原來在大門另一側的隱蔽小房間、只用一張 A4 SIZE 紙作識別的取包處。真係眼大 D 都會睇過隆。 搵死人。
坐機場快軌到機場，只要15分鐘。好過坐的士，又唔會塞車。
可能係成個 TRIP 最歎的一刻 - 北京機場候機室躺椅，座擁 270 度機場景，得幾張。
在北京機場又發生了一件瘀事‧話說候機室內有幾部自動 WIFI 機。按機器上的說法，乘客只要把身份証或護照的 BARCODE 放在機器的 SCANNER 上 SCAN作登記就可以取得 WIFI 密碼免費玩 WIFI。我其實沒有上網的需要，只是屎忽痕，就把回鄉證放入 SCANNER ( 係一個窿) 內試試看。放入回鄉証後，機器良久也沒反應，以為回鄉証唔 WORK，打算拎番張証出來。只是， FUCK ! 個窿太細，張卡入左去拎極都拎唔番到出來。這時細妹大叫 : 「白痴! 呢個窿係俾人入護照架! 身份証同回鄉証係 " DUP" 下面果個格呀!!」愈係心急，張回鄉証就愈係難拎出來。我退下火線，讓阿爸、阿媽、阿妹輪流來試，最後終於由阿妹用另一張薄卡「挑起」張回鄉証再拎番張証出來。一額汗。史稱「北京機場 WIFI 之亂」。
