窮遊伊朗(二) - 伊朗初體驗 : Lost in Translation – Tehran

由於hostel對正大街，第二朝晨早六點幾就俾車聲嘈醒。咁早起身的好處是霸到全hostel惟一一間shower room 沖涼。雖然間野hostel cheap cheap地，但個shower都唔錯。

在伊朗的第一個早上。窗外就有一個清真寺，提醒我真的來到伊斯蘭的國度了。

德黑蘭的Mashhad Hostel，backpacker的聚腳地。

在cool cool 地的hostel boss指導下到hostel附近的商店買sim card及火車票。sim card店的職員唔識英文，我地當時對伊朗幣仍然一頭霧水，對sim card的價值、用量一片混頓。雖然店內有一略懂英文的男顧客幫忙翻譯， 但他的口音很重，聽唔明。在混亂之中我們每人買了一張32萬Rails(大約HKD$90)的sim card，但入面只有2萬Rails的面值，故再多付$50,000充值。後來有local 朋友說sim card應該不會這麼貴，但當時我們連32萬Rails等如幾多HKD都搞唔清，傻更更就買左。

sim card店隔離就係一間travel agent，但個名又唔似係hostel boss 介紹果間。入到去，好似未開工，d 職員叫我地等等先。見職員唔多想理我地，於是走出去嘗試搵吓hostel boss介紹果間店。問途人，點知佢地又帶番我地入番剛才果間travel agent。今次再入去，可能因為已經夠鐘開工，D staff 態度好左，職員識少少英文，買左張今晚7:30出發往聖城Mashhad的火車票，70萬Rails (around HKD$200)，四人卡。伊朗有自己一套的波斯數目字，當時我們仲未背熟每個數目字點寫，望著travel agent打印出來的火車票，入面一個睇得明的英文字或數目字都冇，心想要適應當地的數字及搞清楚買野D價錢真係仲有好長0既路。

睇到人一頭霧水的"蛇仔文"火車飛、巴士飛

搞惦sim card同火車飛之後終於可以去找吃的。Travel agent對面馬路有間裝修簡陋0既食店，估計係平野，都冇理係食乜就入左去。食店個阿伯職員熱情招乎。其他食客都係企0係度食野，但佢就搵左兩張椅俾我地坐。好快又送上兩碗泥黃色糊狀物體及幾塊好似洗碗布毛巾咁款0既烤餅俾我地，後來有local 朋友說那黃色物體是Ash，入面有肉有菜有豆。味道一般。

在伊朗的第一頓飯- 黃色糊狀物體Ash 及「洗碗布」烤餅。差唔多餐餐飯都有機會食到「洗碗布」烤餅，此乃伊朗人的主食。

第一頓飯的餐廳友善伯伯

食飯俾少十倍錢

見食店貼了些寫上五位數字的A4紙，估計是食物的價錢，但睇唔明實際係幾多錢，於是俾兩萬蚊個老細找。但見老闆接過紙幣後搖頭苦笑，先醒起當地人在日常生活中流行用Toman作為幣值，即將以Rails計算的價錢寫少 / 講少個零，所以我地餐飯可能係食左十幾萬，而唔係萬幾，於是索性掏出各式紙幣俾老闆自己挑正確的。老闆挑了其中兩張，同個職員笑笑口又講左一大餐，觀乎其身體語言，估計係想話俾左個折扣我地。臨走時個阿怕仲塞多幾塊洗碗布烤餅俾Rachel。看來我們要快快記熟伊朗數字的寫法。

吃東西後坐地鐵去土耳其領土館附近唱錢。果度係Tehran帳錢店集散地。言語不通，本來打算用售票機買飛，點知部機壞左。去counter買，話左要one way ticket，但職員俾果張飛寫住3-day pass，只係3000 rails，即係HKD$0.9左右，太便宜，都冇追究究竟係職員搞錯左定係佢有心益我地。

之前聽講地鐵站唔俾影相，這是偷影的車站內波斯壁畫。

終於有機會坐到伊朗women only的地鐵車卡。之後我在假日坐地鐵時更有不少女人在women only的車卡內兜售化妝品及accessories。而且仲幾多人買。

唱完錢再坐地鐵去Golestan Palace。由於冇乜英文signage，落車後要問人先搵得到。一路聽講伊朗人對遊客好熱情，會要求合照甚至請遊客番屋企飲茶。我們第一天在Tehran的感覺是當地人尚算友善，走在街上會有人跟我們say hello甚至用普通話講「你好嗎」，但就沒有人叫我地合照，當然更加唔會請我地去屋企坐。不過離開Tehran之後，的確差不多日日都被要求合照。Tehran D 人可能見得遊客多，已經冇咁熱情。

在Tehran市中心很多地方都可以看到雪山。迷路時，往雪山的方向走就是向北了。

Golestan Palace入場費15萬Rails，即HKD$4x，去個別D宮又要俾多5000Rails。可觀性一般。

第一張戴上頭巾、攝於伊朗拍的到此一遊照。這頭巾是去年在拉薩買給媽媽的手信，這次借來當頭巾，貪佢有些少民族風情。但由於質料太厚，沒戴兩天就放棄。又，由於女人在伊朗需要穿上遮蓋pat pat的上衣，我在Esprit Outlet 買左3件其實唔係好合身0既長衫去伊朗著，又借左高我半個頭0既細妹件綠色長外套來著。對於在下這種身材矮小兼輪廓不深的亞洲女仔來講，呢身打扮+頭巾只係將身材樣貌的缺點表露無遺。相反，伊朗 D女仔其實都好識打扮，本來輪廓就夠深0既佢地好多時出街都會化妝，頭巾又戴得既好睇又穩陣，所以大家可以唔使問我去伊朗有冇豔遇。

離開Golestan Palace便去巴扎看看。巴扎有很多入口，選了個較古色古香的入口，但其實入面幾現代化幾乾淨。

Lonely Planet話巴扎入面有間Imam Khomeini Mosque，問左好多人先搵到。其實我地經過個門口好幾次，但因為冇英文signage，根本唔知道入面就係清真寺。

第一次入清真寺參觀，我地唔識規矩，唔敢亂入。見正門只有男人出入，以為得男人可以入去，本來打算影幾張到此一遊照就走。點知臨走時見大門旁邊原來仲有個小側門，係俾女人入去的，二話不說就跟前面0既人入去看看。

在門口脫了鞋後進入禮拜堂，發現清真寺內有屏風將男女分隔開。有不少女士坐在地顫上聊天或休息，坐在我們旁邊的幾個少女不停細聲講大聲笑。其中一個少女忽然把頭巾、chador (即女性身上的黑色長袍)脫掉，露出內裡的低胸小背心和低腰牛仔褲，再換上另一件 Chador和另一個頭巾，還拍了照，似乎清真寺並唔係我地想像中咁莊嚴。本來以為清真寺入面唔可以影相，但既然本地人都影，咁我就唔客氣偷影番張。

在清真寺休息了一會後便回hostel，準備今晚坐過夜火車去聖城Mashhad。我們在hostel遇到一個女backpacker，本身在大理開民宿，這次放低生意一個人去伊朗、巴基斯坦、阿富汗旅行，比TVB果套所謂 <走過烽火大地> 更勇。

被「施捨」了一枝礦泉水

坐左15萬Rails的士去火車站，先去找吃的。火車站有個food court，但只有一間餐廳有英文menu，賣Kebab 飯，最平都要15萬一個，頗貴。其他餐廳都唔係好知係食乜亦唔知幾多錢。見food court有個年青人食緊飯，打手勢問佢個飯0係邊度買，佢指一指果間有英文menu的餐廳 ; 見有個女人食緊漢堡飽，又打手勢問佢0係邊度買，佢指左俾我地睇。由於全場得呢兩個人食緊野，言語不通之下我們就只能在漢堡飽和Kebab 飯之中作出選擇。我們選了吃漢堡飽，剛才食緊飯的青年主動來漢堡飽店幫忙做翻譯。漢堡飽一個賣8萬 (HKD$24)，野飲另計，茄汁沙律醬又要另加  1000 Rails。我地決定乜都唔加，淨係要個飽。食食吓，剛才幫忙做翻譯的青年竟然拎左一大枝礦泉水同兩個紙杯來請我地飲。估計係佢見到我地連1000Rails的茄汁都唔肯俾 (其實即係HKD$0.3)，以為我地好窮，所以買水請我地飲。為左報答呢位青年，我地送出Rachel特意在淘寶買來的中國feel十二生肖金屬書簽俾佢留念。

食飽後拿著那張一個字都睇唔明0既火車票入閘，但在閘口被職員攔住，指了指police office示意我們拿passport去登記。原來伊朗同大陸一樣坐火車要實名登記。Police office的那位金髮靚仔警察在office向我們揮手，示意我們去找他。登記後去上車，由於看不懂坐邊個卡幾號位，上車前把車票交給月台職員看，職員話 “Two”，於是上第二卡，坐低之後又有職員話我地唔係 “Two”，係”7”，在同車乘客的幫助下才找到正確的車卡和座位。同一個包箱內有一對伊朗母女和女兒的兩個小孩。雖然環境頗為擠迫，但兩個小孩沒有大吵大鬧。伊朗母女在火車開出後脫下了頭巾與chador，方發現那個女兒原來留了一頭像Sammi般型格的紅色短髮，十分新潮。火車的床舖挺舒服，還有熱茶和乾糧。14小時的車程不難熬。

火車的上格床

Rachel在下格床拍下了同卡的一家人。下格床還有電視!!

總結第一天在伊朗的感覺是語言障礙比想像中還要大，自由行的難度比去南美州還要高。畢竟西班牙文似英文，尚算看得懂，數字也見慣見熟，沒有問題。在伊朗，唔問人靠自己好多野都做唔到。