澳洲闖蕩之旅(六) -浪蕩東岸之難忘FRASER ISLAND (II)

回到hostel，有各散東西的感覺，只有細佬問我地住邊間房。夜晚去廚房準備晚餐，德國ceo對我說welcome home, 又見大佬同irish couple在吹水，對我大叫"TIK! (因為tak 叫tak，佢地叫我做 tik) come and sit here!"一時間唔識應, 對他說:I'm not tik, my name is Ling! "便走了，回想起來有d寸。


回房寫日記，此時tak已睡著，一心諗住自閉一晚，突然聽見敲門聲，未來得及反應，已見大佬細佬入來叫我們join佢地出hostel泳池旁飲酒吹水。見他們咁有誠意，便出去體驗西方party。

我們組的組員全都一起了。席間組員說我地係best team, also laziest team，因為日日最遲起身，又冇schedule，lunch時自己弄的三文治不能算是三文治，只可說是lunch。但大家分工合作，冇怨言，又冇吵架，行動迅速，所以就算最遲起身都趕到其他team。

大佬飲大兩杯，同我地講佢的身世。原來佢前妻係蔣介石後人，仲有兩個仔女。但佢發現中國文化要求人時常顧及身邊的人，唔可以只顧自己。唔適合佢。問佢識唔識普通話，佢話唔識，不過佢識聽少少廣東話。我同tak大驚，問佢聽唔聽到我地兩個講-既野，佢笑笑口用手指掩口擰頭。

細佬又醒起未見過我同tak穿泳衣下水，要我地趁今晚穿泳裝落泳池。我m到，打死都唔肯，堅稱冇帶泳裝來澳洲，惜冇人信。細佬話既然大家呢世人都未必再見，癲下冇乜所謂，仲坐言起行，自己走去換泳褲，番來時要見到我地穿好泳裝。

我同tak諗過番入房扮換泳裝然後唔出番去，不過最後都乖乖就範。因為m到，我象徵式落一落水便上岸，tak同細佬0係泳池玩得好癲，唔得閒理我。大佬行過，我同tak合力掟佢落水，不過唔夠大力，細佬加入一腳就踢左大佬落水。其他人都來湊熱鬧，仲影埋相。又為我同tak終於著泳裝cheers，很可笑。

換回便服繼續吹水，細佬話未落水前估到我地可能入房扮換泳裝唔出番來，故真經0係我地房出面望我地有冇換到泳裝‧發覺細佬呢兩日都冇乜點理佢女朋友，佢女朋友又好似冇乜野，唔通老外拍拖都係咁?

其後有一班人帶住結他來join我地，以色列情男都有玩。外表騎呢、經常無厘頭說"everything under control"的他原來識音樂，即席自彈自唱，仲加左我同tak個名入歌詞。雖然唔係好聽得清楚佢唱乜，不過都好開心。第一次融入老外的派對。

回想起出發前同呢班成熟老外未出發先交惡，旅程結束時卻又同佢地打成一片，教人意外。fraser island之旅教人最難忘的地方，一定係旅程中遇到的人。